បើកបរក្នុងល្បឿនលឿន រេចង្កូតជ្រុលធ្លាក់ទឹកប្រឡាយ ហើយក្នុងរថយន្តសុទ្ធតែឈើ

រថយន្តពីរគ្រឿង បានបើកបរក្នុងល្បឿនលឿនដូចគ្នា និងជែងគ្នា ហើយទីបំផុតស្រាប់តែមានរថយន្តមួយគ្រឿង រេចង្កូតជ្រុលធ្លាក់ទឹកប្រឡាយ ហើយក្នុងរថយន្តសុទ្ធតែឈើជជុះ តែសំណាងល្អអ្នកបើកបរគ្រាន់តែរបួសស្រាលប៉ុណ្ណោះ។

ហេតុការណ៍នេះ បានកើតឡើងនៅវេលាម៉ោង ៦ និង ១៥នាទី ព្រលប់ ថ្ងៃទី ៥ ខែឧសភា ឆ្នាំ ២០២២ ត្រង់ចំណុចស្ពានរូង ជាប់ប្រឡាយបឹងឈូក ស្ថិតក្នុងភូមិបឹងធំខាងលិច ឃុំអង្គសុរភី ស្រុកកំពង់ត្រាច ខេត្តកំពត លើកំណាត់ផ្លូវជាតិលេខ ៣១ កំពង់ត្រាច-ភ្នំពេញ។

យោងតាមប្រភពព័ត៌មាន នៅកន្លែងកើតហេតុ បាននិយាយថា មុនពេលជួបហេតុការណ៍នេះ គេឃើញរថយន្តពីរគ្រឿងបើកបរប្រដេញគ្នា ទិសដៅពីលិចទៅកើត ក្នុងល្បឿនលឿនដូចគ្នា លុះមកដល់ចំណុចគ្រោះថ្នាក់ ដែលជាចំណុចស្ពាន ស្រាប់តែរថយន្តប្រភេទសាមយ៉ុង ដឹកឈើជជុះមួយគ្រឿងរេខុសផ្លូវ ជ្រុលធ្លាក់ក្នុងទឹកប្រឡាយប្រូងតែម្តង។ ប៉ុន្តែសំណាងល្អ អ្នកបើកបរ និងអ្នករួមដំណើរក្នុងរថយន្តគ្រាន់តែរងរបួសស្រាលៗ ហើយនាំគ្នាស្រវេស្រាវាឡើងមកលើគោកវិញ ទាំងព្រលឹងចុងសក់។

ក្រោយពីកើតហេតុ ម្ចាស់រថយន្តបានហៅឡានស្ទូច មកស្ទូចលើកយករថយន្តទៅឲ្យជាងជួសជុលវិញភ្លាមៗ ដោយមិនបានហៅសមត្ថកិច្ច មកអន្តរាគមន៍ឡើយ៕  

អត្ថបទ៖ សេង ណារិទ្ធ