រថយន្ដដឹកខ្សាច់ បើកថយក្រោយកិនសិស្សសាលាម្នាក់ស្លាប់ភ្លាមៗ

រថយន្ដដឹកខ្សាច់មួយគ្រឿងបើកថយក្រោយមិនប្រុងប្រយ័ត្ន កិនក្មេងប្រុសអាយុ១៥ឆ្នាំ ម្នាក់ស្លាប់ភ្លាមៗ នៅកន្លែងកើតហេតុ។

ហេតុការណ៍នេះកើតឡើងនាព្រឹកថ្ងៃទី២៥ ខែឧសភា ឆ្នាំ២០២២ នៅចំណុចភូមិព្រែកសំរោង២ សង្កាត់តាខ្មៅ ក្រុងតាខ្មៅ ខេត្តកណ្តាល ។

សមត្ថកិច្ចបានអោយដឹងថា សពក្មេងប្រុសរងគ្រោះឈ្មោះ ធី គឹមសេង អាយុ១៥ឆ្នាំ រៀនថ្នាក់ទី៧ នៃអនុវិទ្យាល័យអនុវត្ត ក្រុងតាខ្មៅ ។

ពាក់ព័ន្ធករណីនេះ លោកវរសេនីយ៍ឯក យី វណ្ណដា អធិការនគរបាលក្រុងតាខ្មៅ បានប្រាប់អោយដឹងថា ជនបង្កជាតៃកុងរថយន្ដ ត្រូវបានសមត្ថកិច្ចឃាត់ខ្លួនបានហើយ ដោយកំពុងសាកសួរតាមនីតិវិធី ។

លោកអធិការបន្តថា រថយន្ដនេះបានដឹកខ្សាច់ចូលការដ្ឋានសាងសង់លំនៅឋានរបស់ប្រជាពលរដ្ឋ តែពេលថយក្រោយមិនប្រុងប្រយ័ត្នក៏កិនក្មេងប្រុសជនរងគ្រោះស្លាប់តែម្តង ៕

អត្ថបទ៖ ឆៃ យ៉ា