ស្លាប់៣នាក់ទាំងព្រឹក ក្នុងហេតុការណ៍គ្រោះថ្នាក់ចរាចរណ៍នៅផ្លូវជាតិលេខ១

ហេតុការណ៍គ្រោះថ្នាក់ចរាចរណ៍មួយបណ្ដាលឲ្យមនុស្សប្រុស-ស្រី៣នាក់ស្លាប់ភ្លាមៗ​នៅកន្លែងកើតហេតុ ខណៈបើកបុកជាមួយគោយន្ដកំពុងឆ្លងផ្លូវ។

ករណីគ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង០៥និង១៥នាទីព្រឹក ​ថ្ងៃទី១៣ ខែមិថុនា ឆ្នាំ២០២២ នៅលើកំណាត់ផ្លូវជាតិលេខ១ ចន្លោះគីឡូម៉ែត្រ ៣៤-៣៥ ចំណុចភូមិជ័យឧត្តម ឃុំសំរោងធំ ស្រុកកៀនស្វាយ ខេត្តកណ្តាល។

សមត្ថកិច្ចបានឲ្យដឹងថា ជនរងគ្រោះទាំង៣នាក់មានឈ្មោះ ១ ឈ្មោះ ឈាង ស៊ីន​ភេទប្រុស អាយុ២២ឆ្នាំ​ មានទីលំនៅភូមិប្រស្រែ ឃុំបឹងព្រះ ស្រុកបាភ្នំ ខេត្តព្រៃវែង (អ្នកបើកម៉ូតូ)។ ២ ឈ្មោះ លាង ស្រីនាង ភេទស្រី អាយុ២០ឆ្នាំ​។ និងទី៣ឈ្មោះ​ អោន ធារ៉ា​ ភេទស្រី អាយុ២២ឆ្នាំ មានទីលំនៅភូមិប្រស្រែជាមួយគ្នា។

បើតាមសមត្ថកិច្ចបញ្ជាក់ថា មុនកើតហេតុជនរងគ្រោះជិះម៉ូតូឌុបគ្នា​ម៉ាក HONDA DREAM C125 ពណ៌ខ្មៅ ពាក់ផ្លាកលេខ ភ្នំពេញ1GG-1943 ធ្វើដំណើរ​ទិសដៅពីអ្នក​លឿង ទៅ​ភ្នំពេញ។

សមត្ថកិច្ចបានបន្តថា ខណៈដល់ចំណុចកើតហេតុក៏បុកជាមួយគោយន្តដែលកំពុងបើក​ឆ្លងកាត់​ផ្លូវ បណ្ដាលឲ្យស្លាប់ភ្លាមៗ នៅកន្លែងកើតហេតុទាំង៣នាក់ ចំណែកគោយន្ដ​បានបើកគេចខ្លួនបាត់។

សពជនរងគ្រោះត្រូវបានប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណី រីឯម៉ូតូ សមត្ថកិច្ចយកមករក្សាទុក នៅអធិការដ្ឋាន​នគរបាល​ស្រុកកៀនស្វាយ ដើម្បីស្រាវ​ជ្រាវរកភាគីម្ខាងទៀតមកដោះស្រាយតាមនីតិវិធី៕

អត្ថបទ៖ សុខុម