រថយន្ដពាក់ស្លាកលេខ នគរបាល ដាច់ហ្វ្រាំងធ្លាក់ជ្រោះរបួសធ្ងន់ស្រាល២នាក់

រថយន្តម៉ាកហ៊ីយ៉ាន់ដាយមួយគ្រឿងពាក់ស្លាកលេខ នគរបាល ៣.២០២១ ដែលបើកបរដោយបុរសម្នាក់ និងមានរួមដណើរម្នាក់បានដាច់ហ្វ្រាំងធ្លាក់ជ្រោះ បណ្ដាលឲ្យរងរបួសធ្ងន់ម្នាក់ និងស្រាលម្នាក់ ចំណែករថយន្ដខូចខាតស្ទើរទាំងស្រុង។

ករណីគ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង១២និង១៧នាទី ថ្ងៃទី២៣​ ខែសីហា ឆ្នាំ២០២២ នៅចំណុចចន្លោះគីឡូម៉ែត្រ៩២-៩៣ លើផ្លូវជាតិលេខ៧៦ ស្ថិតក្នុងភូមិ​អណ្ដូងក្រឡឹង ឃុំសែនមនោរម្យ ស្រុកអូររាំង ខេត្តមណ្ឌលគិរី ។

យោងតាមរបាយការណ៍សមត្ថកិច្ចបានឲ្យដឹងថា អ្នកបើកបរឈ្មោះ ឈា សុភ័ក្រ្ត ភេទប្រុស អាយុ៤៣ឆ្នាំ ជនជាតិខ្មែរ មុខរបរអ្នកបើកបររថយន្ត រស់នៅសង្កាត់ជ្រោយចង្វារ ខណ្ឌជ្រោយចង្វា រាជធានីភ្នំពេញ (របួសធ្ងន់) ។ ចំណែកអ្នករួមដំណើរឈ្មោះ ជុំ ដារ៉ូ ភេទប្រុស អាយុ២៥ឆ្នាំ ជនជាតិខ្មែរ មុខរបរព្រូឡាន រស់នៅភូមិខ្នោរការ ឃុំបារ៉ុង ស្រុកល្វាឯម ខេត្តកណ្តាល (រងរបួលស្រាល) ។

ក្នុងរបាយការណ៍បានបញ្ជាក់ថា មូលហេតុ​ដែលបណ្តាលឱ្យគ្រោះថ្នាក់ចរាចរណ៍នេះកើតឡើង មកពីរថយន្ដចុះចំណោតលឿន ហើយដាច់ហ្វ្រាំងក៏បានរេចង្កូតធ្លាក់ជ្រោះតែម្ដង។

ជនរងគ្រោះទាំង០២នាក់ត្រូវបានបញ្ជូនទៅព្យាបាលនៅមន្ទីរពេទ្យរាជធានីភ្នំពេញ រីឯ​រថយន្តត្រូវបានកម្លាំងជំនាញសណ្ដាប់ធ្នាប់កំពុងរករថយន្តស្ទូចយកមករក្សា​ទុកនៅអធិការដ្ឋាននគរបាល​ស្រុកអូររាំង៕