ឡានយីឌុបបើកដល់ផ្លូវបំបែក ប៉ះម៉ូតូមន្ត្រីសុខាភិបាលបណ្ដាលឱ្យរបួសធ្ងន់ តៃកុងរត់បាត់

ហេតុការណ៍គ្រោះថ្នាក់ចរាចរណ៍នេះ បានកើតឡើងនៅថ្ងៃទី២ ខែតុលា ឆ្នាំ២០២២នេះ នៅចំណុចផ្លូវបំបែកលើផ្លូវជាតិលេខ ៦៤ ភូមិរាជានុកូល សង្កាត់ស្ទឹងត្រែង ក្រុងស្ទឹងត្រែង ខេត្តស្ទឹងត្រែង។

សមត្ថកិច្ចចរាចរណ៍ផ្លូវគោកបានឱ្យដឹងថា ករណីគ្រោះថ្នាក់ចរាចរណ៍រនេះ បើតាមសាក្សីឃើញហេតុការណ៍បាននិយាយថា រថយន្តហ៊ីយ៉ាន់ដឹកគល់ឈើធំ ជាប្រភេទរថយន្តវេរអងពណ៌ខៀវ ស្លាកលេខភ្នំពេញ 3C 8243 ទិសដៅពី លិចទៅកើត បានបុកជាមួយម៉ូតូម៉ាកអាសង់ ០១៩ ពណ៍ខ្មៅ ផ្លាកលេខ ស្ទឹងត្រែង 1C 3687 បើកបរពីជើងទៅត្បូង បណ្ដាលឱ្យស្ត្រីម្នាក់ និងក្មេងស្រីម្នាក់រងរបួសធ្ងន់ ត្រូវបានរថយន្តសង្គ្រោះបន្ទាន់ដឹកទៅមន្ទីរពេទ្យខេត្ត។ ចំណែកអ្នកបើកបររថយន្តបានគេចខ្លួនបាត់ ក្រោយកើតហេតុ។

សមត្ថកិច្ចបានឱ្យដឹងបន្តថា ជនរងគ្រោះទាំងពីរនាក់មាន ១. ឈ្មោះ ឡាវ វីដា ភេទ ស្រី អាយុ ៣៧ឆ្នាំ ជនជាតិខ្មែរ មុខ របរមន្ត្រីសុខាភិបាល រស់នៅ ភូមិស្រែក្រសាំង ឃុំ ស្រែក្រសាំងស្រុកសៀមបូក ខេត្តស្ទឹងត្រែង និង២. ឈ្មោះ តាំ អុីវ៉ា ភេទស្រី អាយុ ៧ឆ្នាំ (កូន) រស់នៅភូមិឃុំជាមួយគ្នា។

សមត្ថកិច្ចបញ្ជាក់ថា ករណីគ្រោះថ្នាក់ចរាចរណ៍ខាងលើនេះ បណ្ដាលមកពីកត្តាបើកបរខ្វះការប្រុងប្រយ័ត្ន។ ក្រោយកើត ហេតុសមត្ថកិច្ចបានធ្វើការចុះវាស់វែង នាំយករថយន្ត និងម៉ូតូទៅរក្សាទុកនៅការិយាល័យចរាចរណ៍ផ្លូវគោក ដើម្បីចាត់ការបន្តទៅតាមនីតិវិធី៕

អត្ថបទ៖ ងិន លីម