ស្លាប់២នាក់ និងរបួស៣នាក់ ករណីគ្រោះថ្នាក់ចរាចរណ៍នៅខេត្តកោះកុង

ស្នងការដ្ឋាននគរបាលខេត្តកោះកុង បង្ហាញថា ៣ថ្ងៃអំឡុងពិធីបុណ្យចូលឆ្នាំថ្មី ប្រពៃណីជាតិចិន វៀតណាម មានមនុស្សស្លាប់២នាក់ និងរងរបួស៣នាក់ ក្នុងករណីគ្រោះថ្នាក់ចរាចរណ៍។

លោក កៅ ប៊ុនគីម ស្នងការរងនគបាលខេត្តកោះកុង ទទួលបន្ទុកផែនសណ្តាប់ធ្នាប់ និងចរាចរណ៍ បានឱ្យដឹងនៅរសៀលថ្ងៃទី២៣ ខែមករា ឆ្នាំ២០២៣ ថា មានករណីគ្រោះថ្នាក់ចរាចរណ៍ធំៗចំនួន២ករណីបណ្តាលឱ្យមនុស្សប្រុសស្លាប់២នាក់ បង្កឱ្យខូចខាតរថយន្ត និងម៉ូតូយ៉ាងធ្ងន់ធ្ងរ ដោយមានមនុស្ស៣នាក់រងរបួសផងដែរ។

លោក កៅ ប៊ុនគីម បន្ថែមថា វេលាម៉ោង៨និង៣០នាទីយប់ កាលពីថ្ងៃ២១ ខែមករា នៅចំណុចលើស្ពានកោះប៉ោង ក្នុងភូមិនាងកុក ឃុំបាក់ខ្លង ស្រុកមណ្ឌលសីមា ខេត្តកោះកុង មានគ្រោះថ្នាក់ចរាចរណ៍បង្កឱ្យមនុស្សស្លាប់ម្នាក់ ភេទប្រុស និងមនុស្សរងរបួសធ្ងន់២នាក់ មូលហេតុអ្នកបើកបររថយន្តមិនគោរពស្ដាំ។ បច្ចុប្បន្នសមត្ថកិច្ចកំពុងបំពេញសំណុំរឿងតាមនីតិវិធីបញ្ជូនទៅតុលាការ។

ដោយឡែកកាលពីយប់ថ្ងៃទី២១ ខែមករា ម៉ោង៩និង២៥នាទីយប់ ក៏មានករណីគ្រោះថ្នាក់ចរាចរណ៍ផ្លូវគោកមួយករណីទៀតរវាងរថយន្តនិងម៉ូតូបុកគ្នា ស្ថិតនៅក្នុងភូមិ៣ សង្កាត់ស្មាច់មានជ័យ ក្រុងខេមរៈភូមិន្ទ។ គ្រោះថ្នាក់ចរាចរណ៍នេះដែរ ក៏បណ្ដាលឱ្យមនុស្សស្លាប់១នាក់ ភេទប្រុស និងរងរបួសធ្ងន់១នាក់ ភេទប្រុស ដោយបណ្តាលមកពីអ្នកបើកបររថយន្ត វ៉ាជែងខ្វះការប្រុងប្រយ័ត្ន។ ករណីខាងលើ សមត្ថកិច្ចបានធ្វើការសម្របសម្រួលរួចរាល់ និងបញ្ជូនសំណុំរឿងទៅតុលាការ។

ក្រៅពីករណីគ្រោះថ្នាក់ចរាចរណ៍ធំៗចំនួន២ករណីខាងលើ អំឡុងថ្ងៃសែនចូលឆ្នាំចិនវៀតណាម ដំបូងក៏មានគ្រោះថ្នាក់ចរាចរណ៍តូចផងដែរ ប៉ុន្តែសមត្ថកិច្ចមិនបានចាត់បញ្ចូនក្នុងរបាយការណ៍នោះទេ។ សមត្ថកិច្ចបានដាក់ពង្រាយកងកម្លាំងរបស់ខ្លួនតាមគោលដៅសំខាន់ៗ ដើម្បីត្រៀមអន្តរាគមន៍សណ្តាប់ធ្នាប់សន្តិសុខជូនដល់ប្រជាពលរដ្ឋ និងអ្នកទេសចរ៕

អត្តបទ៖ សិរីវឌ្ឍនៈ