ចរាចរណ៍

របួសមនុស្សមួយចំនួន ពេលឡានក្រុងធ្លាក់ផ្លូវចូលចម្ការស្វាយ

បានផុស

២ years មុន

នៅ

ថ្ងៃចន្ទ ១៣ កុម្ភៈ ២០២៣

ដោយ

យ៉ាងហោចណាស់ក៏មានអ្នកដំណើរប្រមាណ ៥ នាក់ដែរ រួមទាំងអ្នកបើកបរ ដែលបានរងរបួសបែកក្បាល និងបាក់ជើង ខណៈកំពុងជិះលើរថយន្តក្រុង ហើយរថយន្តកំពុងស្ថិតក្នុងល្បឿនលឿន ស្រាប់តែរេចង្កូតធ្លាក់ផ្លូវចូលក្នុងចម្ការស្វាយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមការរៀបរាប់ពីម្ចាស់ចម្ការស្វាយ បាននិយាយថា នៅវេលាម៉ោង ៣ និង ៤០ នាទី ទៀបភ្លឺ ថ្ងៃទី ១៣ ខែកុម្ភៈនេះ ស្រាប់តែមានរថយន្តក្រុងមួយគ្រឿង បើកធ្លាក់ផ្លូវបុករបងគាត់បាក់ ហើយបានជ្រុលទៅបុកខ្ចុះដែលគាត់កំពុងសម្រាកជាមួយកម្មករ និងមានចម្ងាយប្រមាណ ៣០ ម៉ែត្រ ពីផ្លូវជាតិ បណ្ដាលឲ្យកម្មករគាត់ម្នាក់រងរបួស។

នៅពេលនោះដែរ លើរថយន្តមានអ្នកដំណើរតែ ៧ នាក់ប៉ុណ្ណោះ ដោយខ្លះបែកក្បាល និងមានម្នាក់បាក់ជើង។ ដោយឡែកអ្នកបើកបរក៏រងរបួសបែកក្បាលដែរ ហើយភ្លាមៗនោះ ក៏មានរថយន្តគ្នាគេមកទទួលយកមនុស្សចេញទៅអស់ ព្រមទាំងបានដោះស្លាកលេខយកទៅជាមួយផង។ រថយន្តនេះគឺរត់ឈ្នួល ក្នុងទិសដៅ សំពៅលូន . កាប៊ីន . ឡែម (រត់តាមបណ្ដោយខ្សែបន្ទាត់ព្រំដែន ៣ ស្រុកខាងលិច)។

ក្រោយពីសមត្ថកិច្ចចុះត្រួតពិនិត្យអាចសន្និដ្ឋានបានខ្លះៗថា រថយន្តនេះរេធ្លាក់ផ្លូវក្នុងល្បឿនលឿន ដោយសារបែកកង់ម្ខាង។ បច្ចុប្បន្នសមត្ថកិច្ចជំនាញ កំពុងចាត់ចែងអូសទៅរក្សាទុកជាបណ្ដោះអាសន្ន៕

អត្ថបទ ៖ សោ និយមរ័ត្ន