រថយន្ដដឹកជ្រូកបុករៈអ្នកអង្គុយហូបបាយនៅផ្សារត្រាំខ្នារបួសធ្ងន់២នាក់

មនុស្សប្រុសស្រីចំនួន៣នាក់ បានរងរបួសធ្ងន់ និងស្រាល ខណៈដែលកំពុងអង្គុយហូបបាននៅក្បែរចិញ្ចើមផ្លូវត្រូវរថយន្ដដឹកជ្រូកបើកបុករៈ និងខូចខាតសម្ភារមួយចំនួនទៀត។

ករណីនេះបានកើតឡើងនៅរសៀលថ្ងៃទី៩ ខែមិថុនា ឆ្នាំ២០២៣នេះ នៅចំណុចផ្សារត្រាំខ្នា ផ្លូវជាតិលេខ៣ ក្នុងស្រុកបាទី ខេត្តតាកែវ។

បើតាមលោកវរសេនីយ៍ឯក ឆាយ កែវមុនី អធិការនៃអធិការដ្ឋាននគរបាលស្រុកបាទី បានឲ្យដឹងតាមទូរស័ព្ទមុននេះថា ករណីគ្រោះថ្នាក់ចរាចរន៍នេះបង្កឡើងដោយរថយន្ដដឹកជ្រូក បណ្ដាលឲ្យរបួសធ្ងន់ពីរនាក់ជាមនុស្សប្រុស និងស្រាលម្នាក់ជាស្ត្រី។ លោកអធិការស្រុកបញ្ជាក់ថា មុនកើតហេតុរថយ្ដដឹកជ្រូកបានធ្វើដំណើរមកពីទិសខាងលិច គោលបំណងឡើងផ្លូវជាតិលេខ៣ បត់ឆ្វេង​ តែពេលគំពុងបត់ក៏ជ្រុលបុករះជនរងគ្រោះដែលកំពុងហូបបាយនៅកែងផ្លូវតែម្ដង។

លោកអធិការស្រុកបន្ថែមថា ជនរងគ្រោះត្រូវបានបញ្ជូនទៅសង្គ្រោះនៅមន្ទីរពេទ្យរួចហើយ ចំណែករថយន្ដបង្កត្រូវបានកម្លាំងជំនាញកំពុងធ្វើការវាស់វែងយកទៅរក្សាទុកនៅអធិការដ្ឋាននគរបាលស្រុកបាទី ដើម្បីរង់ចាំដោះស្រាយតាមផ្លូវច្បាប់៕

អត្ថបទ៖ សុខុម