ចរាចរណ៍

ពីរករណីផ្សេងគ្នាក្នុងថ្ងៃតែមួយ បណ្ដាលឲ្យមនុស្ស២នាក់ស្លាប់ និងម្នាក់ទៀតរងរបួសធ្ងន់

បានផុស

៤ years មុន

នៅ

ថ្ងៃអង្គារ ២៦ មករា ២០២១

ដោយ

ក្នុងរយះពេលមួយថ្ងៃ មានមនុស្ស២នាក់បានស្លាប់ និងរងរបួសធ្ងន់ម្នាក់ ដោយសារករណីគ្រោះថ្នាក់ចរាចរណ៍ពីរផ្សេងគ្នា នៅស្រុកភ្នំស្រុក និងក្រុងសិរីសោភ័ណ ខេត្តបន្ទាយមានជ័យ។

លោកវរសេនីយ៍ឯក គី មករា នាយការិយាល័យនគរបាលចរាចរណ៍ខេត្តបានឲ្យដឹងថា នៅវេលាម៉ោង៧យប់ថ្ងៃទី២៤ ខែមករា ឆ្នាំ២០២១ នៅលើកំណាត់ផ្លូវជាតិលេខ៦ នៅទល់មុខឈៀងខាងលិចស្ថានីយ៍ប្រេង ស៊ីម ឃីម ចម្ងាយ៥០ម៉ែត្រ ក្នុងភូមិសាលាក្រៅ សង្កាត់ភ្នៀត ក្រុងសិរីសោភ័ណ ខេត្តបន្ទាយមានជ័យ មានករណីគ្រោះថ្នាក់ចរាចរណ៍មួយ ដោយជនរងគ្រោះបើកម៉ូតូម៉ាកហុងដាឌ្រីមសេ១២៥ពណ៌ខ្មៅ ពាក់ស្លាកលេខប.មានជ័យ1Q-៥៤១២ បើកទៅបុកគោយន្តកន្ត្រៃពីក្រោយ បណ្តាលឲ្យដួលខ្ទាតទៅទ្រូងថ្នល់ ត្រូវរថយន្តតូចមិនស្គាល់ម៉ាកបុកកិនបន្ថែមបណ្តាលឲ្យស្លាប់នៅនឹងកន្លែងកើតហេតុ និងម្នាក់ទៀតរងរបួសធ្ងន់ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជនរងគ្រោះទាំងអ្នកស្លាប់និងរបួសធ្ងន់មិនទាន់បានស្គាល់អត្តសញ្ញាណនោះទេ។ ក្រោយកើតហេតុគោយន្តកន្ត្រៃនិងរថយន្តបើកគេចខ្លួនបាត់ ។

លោកបានបញ្ជាក់ឲ្យដឹងបន្តទៀតថា ចំណែកនៅស្រុកភ្នំស្រុក កាលពីវេលាម៉ោង៩យប់ថ្ងៃទី២៤ ខែមករា ឆ្នាំ២០២១នេះដែរ នៅត្រង់ចំណុចលើខ្នងអាងពន្លៃ ស្ថិតនៅភូមិពន្លៃ ឃុំពន្លៃ ស្រុកភ្នំស្រុក ខេត្តបន្ទាយមានជ័យ មានករណីគ្រោះថ្នាក់ចរាចរណ៍កើតឡើងបង្កដោយខ្លួនឯង ។ អ្នកដែលស្លាប់នៅក្នុងហេតុការណ៍គ្រោះថ្នាក់នេះ ឈ្មោះប្រែង ភារុណ ភេទប្រុស អាយុ២៨ឆ្នាំ រស់នៅភូមិពន្លៃ ឃុំពន្លៃ ស្រុកភ្នំស្រុក បើកម៉ូតូម៉ាក វេវ អ៊ី សេរីឆ្នាំ២០១៥ ពណ៌ខ្មៅ-ទឹកប៊ិច គ្មានស្លាកលេខ បើកក្នុងទិសដៅពីត្បូងទៅជើង ក្នុងល្បឿនលឿនសង្ស័យស្រវឹង ដល់ចំណុចកើតហេតុផ្លូវកោងបានរេងចង្កូតបុកបង្គោលចំណាំងផ្លាតបណ្ដាលឲ្យបោកក្បាលស្លាប់ភ្លាមៗនៅនឹងកន្លែងកើតហេតុ។

ទាំង២ករណីនេះ មានមនុស្ស២នាក់ស្លាប់ ប្រគល់ជូនក្រុមគ្រួសារយកទៅធ្វើបុណ្យតាមប្រពៃណីនិងរងរបួសធ្ងន់ម្នាក់ បញ្ជូនទៅព្យាបាលនៅមន្ទីរពេទ្យ ចំណែកវត្ថុតាងនគរបាលយកទៅរក្សាទុកនៅអធិការដើម្បីដោះស្រាយនៅពេលក្រោយ៕

អត្ថបទ ៖ វ៉ាន់ ណាង

Related Topics: