សម្តេចធិបតី៖ ឧទ្យានជាតិគីរីរម្យ មានគោលដៅទាក់ទាញសំខាន់ៗចំនួន៨

សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា នៅថ្ងៃទី២៩ ខែឧសភា ឆ្នាំ២០២៤ បានឱ្យដឹងថា ឧទ្យានជាតិព្រះសុរាម្រិតកុសុមៈគីរីរម្យ មានគោលដៅទាក់ទាញសំខាន់ៗចំនួន៨។

សម្តេចបានបញ្ជាក់ថា ឧទ្យានជាតិព្រះសុរាម្រិតកុសុមៈគីរីរម្យ ដែលមានឈ្មោះល្បីល្បាញថា ឧទ្យានជាតិគិរីរម្យ ជាឧទ្យានជាតិនៃព្រះរាជាណាចក្រកម្ពុជាដែលស្ថិតនៅចម្ងាយ ១១២គីឡូម៉ែត្រ ពីរាជធានីភ្នំពេញ និងស្ថិតនៅក្នុងភូមិសាស្ត្រខេត្តកំពង់ស្ពឺ និងខេត្តព្រះសីហនុ ដោយលាតសន្ធឹងលើផ្ទៃដីដែលមានព្រៃឈើប្រមាណ ៨ម៉ឺនហិកតា ព្រមទាំងជាឧទ្យានជាតិដែលបង្កើតឡើងជាផ្លូវការដំបូងបង្អស់នៅកម្ពុជា។

ឧទ្យាន​ជាតិ​គិរីរម្យ​ គឺ​ជា​​រមណីយដ្ឋាន​ទេសចរណ៍​ធម្មជាតិ​ ដែលសម្បូរពោរពាសទៅដោយសក្តានុពលធម្មជាតិ ជាមួយនឹង​ទេសភាព​​ល្អ​ប្រណិត​ អាកាសធាតុល្អបរិសុទ្ធគ្រប់រដូវកាល និងមានលម្អទៅ​ដោយ​ដើម​ស្រល់​​ធម្មជាតិ​​ ជាមួយនឹងជ្រោះជ្រង ​និងទឹក​ធ្លាក់​ជា​ច្រើននៅលើកំពូលភ្នំ។ ជាមួយគ្នានេះ ការរៀបចំសម្បទាទេសចរណ៍នៅក្នុងឧទ្យាន ក៏មានគ្រប់លក្ខណៈ ដើម្បីតម្រូវការសម្រាកលំហែរបស់អ្នកទេសចរជាតិ និងអន្តរជាតិផងដែរ ក្នុងនោះ មានគោលដៅទាក់ទាញសំខាន់ៗជាច្រើន។

គោលដៅសំខាន់ៗទាំងអស់នៃឧទ្យាន មានដូចជា រមណីយដ្ឋាន វីគិរីរម្យ ផាញរីស៊ត, រំហើយ គិរីរម្យ រីស៊ត, បឹងចំការតែ, ភូមិដំណាក់ដំរី, ទឹកធ្លាក់ឆៃយ៉ា, បឹងប៉េសេ, ឧទ្យានបោះតង់ និងទឹកធ្លាក់អូតាសេក៕