បុរសជនជាតិចិនបើករថយន្ដបុករបាំងថ្មចែកទ្រូងផ្លូវក្រឡាប់ផ្ងារជើង

បុរសជាជនជាតិចិនម្នាក់បើករថយន្តក្នុងល្បឿនលឿន បានរេចង្កូតជ្រុលទៅបុកក្បាលនាគពុះចែកទ្រូងផ្លូវ នៅក្នុងបរិវេណកោះពេជ្រ បណ្តាលអោយក្រឡាប់នៅកណ្តាលផ្លូវតែម្តង។

គ្រោះថ្នាក់ចរាចរណ៍នេះដែរបានកើតឡើងកាលពីវេលាម៉ោង៤ទៀបភ្លឺឈានចូលថ្ងៃទី២៦ ខែមិថុនា ឆ្នាំ២០២៤ ស្ថិតនៅត្រង់ចំណុចខាងកើតស្ពានឥន្ធនូកោះពេជ្រ តាមបណ្តោយផ្លូវបេតុង ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ។

បើតាមប្រភពព័ត៌មានពីសន្តិសុខនៅក្នុងកោះពេជ្របានឲ្យដឹងថា មុនពេលកើតហេតុ ខណៈគាត់កំពុងយាមនៅបរិវេណកន្លែងកើតហេតុ ក៏ស្រាប់តែឃើញរថយន្តឡង់គ្រីស័រ ពណ៌ស ១គ្រឿង ពាក់ស្លាកលេខ ភ្នំពេញ 2BC-3939 ដែលបើកបរដោយជនជាតិចិន ធ្វើដំណើរពីកើតមកលិចក្នុងល្បឿនលឿនឆ្ពោះទៅស្ពានឥន្ធនូ។

ប្រភពដដែលបន្តទៀតថា លុះមកដល់ចំណុចកើតហេតុ រថយន្តក៏ស្រាប់តែរេចង្កូត ជ្រុលទៅបុកក្បាលនាគពុះចែកទ្រូងផ្លូវចំនួន០១កង់ពេញទំហឹង បណ្តាលឲ្យក្រឡាប់រថយន្តភ្លាមៗតែម្តង។ ភ្លាមៗ ម្ចាស់រថយន្តបើកទ្វារចេញមកក្រៅ រួចក៏រត់គេចខ្លួនទីតាំងកើតហេតុបាត់តែម្តង សំណាងល្អក៏មិនបង្កអោយនរណារងរបួសនោះឡើយ។ ចំណែករថយន្តបង្ករងការខូចខាតមួយកំណាត់មុខបែកកញ្ចក់ ខូចខាតមួយចំហៀងខាងស្តាំ និងផ្នែកដំបូល។

ក្រោយពេលកើតហេតុ គេឃើញមានតំណាងម្ចាស់រថយន្ត មកធ្វើការដោះស្រាយគ្នាជាមួយអ្នកគ្រប់គ្រងក្នុងទីក្រុងកោះពេជ្រ និងចេញថ្លៃសំណងរាល់ការខូចខាត ដើម្បីបញ្ចប់រឿងនៅកន្លែងកើតហេតុតែម្តង៕

អត្ថបទ៖ រដ្ឋា