រថយន្តនគរបាលបុកបង្គោលភ្លើងបំភ្លឺផ្លូវ និងបង្គោលសា្លកសញ្ញាចរាចរណ៍

បុរសម្នាក់បើករថយន្តសុីរ៉ែនពាក់ស្លាកលេខ នគបាល បុកបង្គោលភ្លើង និងស្លាកសញ្ញាប្រាប់ឈ្មោះផ្លូវ បណ្តាលអោយរថយន្តខូចខាតមួយចំហៀងស្ទើរទាំងស្រុង។

ហេតុការណ៍នេះដែរបានកើតឡើងកាលពីវេលាម៉ោង១០និង៤០នាទីយប់ថ្ងៃទី១៤ ខែកក្កដា ឆ្នាំ២០២៤ នៅត្រង់ចំណុចស្តុបទឹកល្អក់ទី៣ តាមបណ្តោយផ្លូវ ១៨២ សង្កាត់ទឹកល្អក់ទី០៣ ខណ្ឌទួលគោក រាជធានីភ្នំពេញ។

បើតាមប្រភពព័ត៍មានពីប្រជាពលរដ្ឋបានប្រាប់អោយដឹងថា មុនពេលកើតហេតុ គេបានឃើញបុរសម្នាក់បើកបររថយន្ត​សុីរ៉ែនមួយគ្រឿងម៉ាក តូយូតា វីហ្គូ ពាក់ស្លាកលេខ នគរបាល 2-1277 បើកបរតាមបណ្តោយផ្លូវ ១៨២ ទិសដៅពីកើតទៅលិច ក្នុងល្បឿនលឿន។ លុះបើកមកដល់ចំណុចស្តុបទឹកល្អក់ទី០៣ ដោយរថយន្តខាងលើខ្វះការប្រុងប្រយ័ត្ន បានរេចង្កូតជ្រុលទៅបុកបង្គោលបំភ្លឺផ្លូវ និងស្លាកសញ្ញាប្រាប់ឈ្មោះផ្លូវ បណ្តាលអោយខូចខាតតែម្តង។ ចំណែករថយន្តបានរងការខូចខាត ផ្នែកខាងមុខ ចំហៀងខាងស្តាំ ស្ទើរទាំងស្រុង សំណាងល្អមិនបង្កអោយនរណារងរបួសនោះឡើយ។ ភ្លាមៗ បុរសជាអ្នកបើករថយន្តបង្ក បានចុះពីលើរថយន្តរួចឡើងជិះកង់បីគេចខ្លួនបាតស្រមោល បន្សល់ទុករថយន្តនៅកន្លែងកើតហេតុ។

ក្រោយកើតហេតុ សមត្ថកិច្ចមូលដ្ឋានបានចុះមកដល់រួចធ្វើការទាក់ទងទៅសមត្ថកិច្ចជំនាញ នៃការិយាល័យចរាចរណ៍ផ្លូវគោក ដើម្បីមកស្ទូចយកទៅរក្សាទុករង់ចាំដោះស្រាយ៕

អត្ថបទ៖ រដ្ឋា