ចរាចរណ៍

រដ្ឋាករទឹកស្វយ័តរាជធានីភ្នំពេញ បន្សល់ទុកជង្ហុកបង្កគ្រោះថ្នាក់ដល់អ្នកដំណើរ

បានផុស

៦ ខែ មុន

នៅ

ថ្ងៃចន្ទ ២ កញ្ញា ២០២៤

ដោយ

បុរសម្នាក់បានរងរបួសធ្ងន់ត្រូវបានបញ្ជូនទៅសង្គ្រោះនៅមន្ទីរពេទ្យ ដោយសារជិះម៉ូតូធ្លាក់ជង្ហុកដែលបន្សល់ទុកពីក្រុមការងាររដ្ឋាករទឹកស្វយ័តរាជធានីភ្នំពេញ បន្ទាប់ពីជីកកាយបង្កប់ទុយោទឹកស្អាតក្រោមដីតែមិនបានចាក់បេតុងឲ្យបានស្អាតឡើងវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍គ្រោះថ្នាក់ដែលបង្គដោយជង្ហុករបស់ក្រុមការងារទឹកស្អាតនេះ បានកើតឡើងកាលពីព្រឹកថ្ងៃទី២ ខែកញ ឆ្នាំ២០២៤ វេលាម៉ោង៦និង១០នាទី នៅតាមមហាវិថីឈ្នះឈ្នះ ស្ថិតនៅក្នុងភូមិស្រែរាជ្ជះ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។

ជនរងគ្រោះត្រូវបានគេស្គាល់ឈ្មោះ គង់ សំអឿន ភេទប្រុស អាយុ៣៨ឆ្នាំ មានទីលំនៅភូមិអណ្ដូងច្រុះ ឃុំត្រាចទង ក្រុងឧត្តុងម៉ែជ័យ ខេត្តកំពង់ស្ពឺ ជិះម៉ូតូ១គ្រឿងម៉ាកហុងដាឌ្រីមសេ១២៥ ពណ៍ខ្មៅពាក់ស្លាកលេខភ្នំពេញ1DO-7758 ។ ត្រូវបានក្រុមសង្គ្រោះនៃមន្ទីរពេទ្យជាតិតេជោសន្តិភាព ដឹកយកទៅសង្គ្រោះបន្ទាន់ភ្លាមៗ។

ប្រជាពលរដ្ឋបានប្រាប់ថា មុនពេលកើតហេតុគាត់បានឃើញបុរសរងគ្រោះជិះម៉ូតូធ្វើដំណើរក្នុងទិសដៅពីជើងទៅត្បូង ក្នុងល្បឿនលឿន លុះពេលទៅដល់ចំណុចកើតហេតុក៏បានរេចង្កូតធ្លាក់ជង្ហុកបណ្ដាលឲ្យរងរបួសធ្ងន់។ ប្រភពដដែលបានប្រាប់ឲ្យដឹងបន្តទៀតថា ជង្ហុកបែបនេះគឺបន្សល់ទុកដោយក្រុមការងាររដ្ឋាករស្វយ័តរាជធានៅភ្នំពេញនាពេលកន្លងមក ក្រោយពីកាត់ផ្លូវជីកកាយដើម្បីដាក់បង្កប់ទុយោទឹកស្អាតក្រោមដី ហើយបន្ទាប់ពីការដ្ឋានបានបញ្ចប់ គឺពុំមានការជួសជុលចាក់បេតុងដូចដើមឡើងវិញនោះទេ ដោយគ្រាន់តែចាក់ដី និងកម្ទេចថ្មលុបជាការស្រេច លុះពេលរថយន្តធន់ធ្ងន់បើកកាត់ក៏បណ្ដាលឲ្យផុងជាប់កង់ បង្កើតបានជាជង្ហុកច្រើនថ្ងៃមកហើយ៕

អត្ថបទ៖ សំណាង