ចរាចរណ៍

ជិះម៉ូតូលឿន ទាក់ដៃចង្កូតជាមួយរ៉ឺម៉កដឹកអីវ៉ាន់ ដួលបោកក្បាលបាត់បង់ជីវិត

បានផុស

២ ខែ មុន

នៅ

ថ្ងៃសុក្រ ២០ កញ្ញា ២០២៤

ដោយ

បុរសម្នាក់ បានបាត់បង់ជីវិតភ្លាមៗ ខណៈជិះម៉ូតូលឿន គួបផ្សំផ្លូវរអិលទឹកភ្លៀង វាក់អើនឹងរ៉ឺម៉កដឹកអីវ៉ាន់សំពីងសំពោងបើកបញ្ច្រាសគ្នា បណ្ដាលឲ្យទាក់ដៃចង្កូតម៉ូតូ ដួលបោកនឹងថ្នល់ រីឯរ៉ឺម៉កម៉ូតូក៏បើកបន្តដំណើរទៅមុខបាត់ទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះកើតឡើងកាលពីវេលាម៉ោង ១០ និង ១៥ នាទី ព្រឹកថ្ងៃទី ២០ ខែកញ្ញា ឆ្នាំ ២០២៤ លើកំណាត់ផ្លូវ ភ្នំពេញ-ហាណូយ ក្បែរផ្លូវរថភ្លើង ស្ថិតក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ។

តាមសាក្សីដែលឃើញហេតុការណ៍ បានឲ្យដឹងថា មុនពេលកើតហេតុ គេឃើញបុរសខាងលើជិះម៉ូតូមួយគ្រឿង ម៉ាកហុងដាស្កុបពី ពណ៌ខ្មៅ ពាក់ស្លាកលេខ ភ្នំពេញ 1IQ -0701 តែម្នាក់ឯង តាមបណ្ដោយផ្លូវ ភ្នំពេញ-ហាណូយ ទិសដៅពីជើងទៅត្បូង ក្នុងល្បឿនលឿន។ រីឯរ៉ឺម៉កម៉ូតូ ទិសដៅពីត្បូងទៅជើង ដឹកអីវ៉ាន់សំពីងសំពោង ម៉ូតូជនរងគ្រោះបានទាក់ដៃចង្កូតដួលទៅថ្នល់បោកស្លាប់តែម្ដង (ជនរងគ្រោះមានពាក់មួកសុវត្ថិភាព)។ ក្នុងនោះ រ៉ឺម៉កម៉ូតូដឹកអីវ៉ាន់ ក៏បានបន្តដំណើរទៅមុខបាត់ទៅ គ្មានអ្នកជួយឃាត់នោះទេ។

សពជនរងគ្រោះឈ្មោះ ភី វិថី អាយុ ២៨ ឆ្នាំ មានស្រុកកំណើត ភូមិពងទឹក ឃុំស្ដេចគង់ខាងជើង ស្រុកបន្ទាយមាស ខេត្តកំពត ជិះម៉ូតូមួយគ្រឿង ម៉ាកហុងដាស្កុបពី ពណ៌ខ្មៅ ពាក់ស្លាកលេខ ភ្នំពេញ 1IQ -0701។

ក្រោយកើតហេតុ សមត្ថកិច្ចមូលដ្ឋាន បានសហការជាមួយសមត្ថកិច្ចជំនាញ ចុះមកវាស់វែងយកម៉ូតូទៅរក្សាទុកនៅការិយាល័យចរាចរណ៍ផ្លូវគោក រង់ចាំដោះស្រាយតាមនីតិវិធីច្បាប់។ ចំណែកសព ត្រូវបានសមត្ថកិច្ចស្រាវជ្រាវរកសាច់ញាតិមកទទួលយកទៅធ្វើបុណ្យតាមប្រពៃណី។

សូមបញ្ជាក់ថា ទីតាំងខាងលើមានការដ្ឋានកំពុងកាត់ផ្លូវដាក់តបណ្ដាញខ្សែភ្លើង ធ្វើឲ្យផ្លូវមានការមមាញឹកម្ខាង ទើបខាងការដ្ឋានបានបញ្ចៀសចរាចរណ៍ឲ្យមធ្យោបាយធ្វើដំណើរមួយចំនួនមកធ្វើចរាចរណ៍នៅផ្លូវម្ខាងទៀត ដែលជាចំណុចកើតហេតុ៕

អត្ថបទ ៖ សំណាង