ចរាចរណ៍

គ្រោះថ្នាក់ចរាចរណ៍បន្តិចបន្តួចបង្កជាហិង្សា នគរបាលឃាត់ខ្លួនភាគីទាំងពីរយកមកសាកសួរ

បានផុស

៥ ខែ មុន

នៅ

ថ្ងៃចន្ទ ១៤ តុលា ២០២៤

ដោយ

យោងតាមផេកផ្លូវការរបស់ស្នងការដ្ឋាននគរបាលរាជធានី បានឱ្យដឹងនៅរសៀលថ្ងៃទី ១៤ ខែតុលា ឆ្នាំ ២០២៤ នេះថា កម្លាំងនគរបាលបានឃាត់ខ្លួនមនុស្សប្រុស-ស្រី ចំនួន ០៦ នាក់ ក្រោយបង្កហិង្សា ពាក់ព័ន្ធគ្រោះថ្នាក់ចរាចរណ៍បន្តិចបន្តួចរវាងរថយន្ត និងម៉ូតូ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមត្ថកិច្ចបានឱ្យដឹងថា កាលពីវេលាម៉ោង ២៣ និង ៣០ នាទី ថ្ងៃទី ១៣ ខែតុលា ឆ្នាំ ២០២៤ ស្ថិតនៅចំណុចផ្លូវទន្លេសាប ភូមិ ០៣ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ មានករណីហិង្សា ផ្តើមឡើងពីគ្រោះថ្នាក់ចរាចរណ៍រវាងម៉ូតូ និងរថយន្ត បានរងការខូចខាតបន្តិចបន្តួច ដែលឈានដល់ការប្រើអំពើហិង្សានាំឲ្យភាគីខាងរថយន្តរងការបែកក្បាល និងភាគីខាងម៉ូតូរងរបួសបែកមាត់ និងពកក្បាល។

សមត្ថកិច្ចបានឱ្យដឹងបន្តថា ភាគីម៉ូតូឈ្មោះ ហ៊ីម អាល់ឡាវីន ភេទប្រុស អាយុ ៤១ ឆ្នាំ ស្នាក់នៅផ្លូវវិហារឥស្លាម ភូមិ ០២ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ មុខរបរលក់សាច់គោ។ ចំណែកភាគីរថយន្តមានចំនួន ០៥ នាក់ ៖ ០១-ឈ្មោះ សុខ ធីតា ភេទស្រី អាយុ ៣១ ឆ្នាំ ជនជាតិខ្មែរ គ្មានរបួស។ ០២-ឈ្មោះ May Hoang Dai អាយុ ៣៤ ឆ្នាំ ជនជាតិវៀតណាម រងរបួសបែកក្បាល (អ្នកទេសចរ)។ ០៣-ឈ្មោះ Hai Hong Hung ភេទប្រុស អាយុ ៣៨ ឆ្នាំ ជនជាតិវៀតណាម គ្មានរបួស (អ្នកទេសចរ)។ ០៤-ឈ្មោះ Ghuyan Ha ភេទស្រី អាយុ ២៤ ឆ្នាំ ជនជាតិវៀតណាម គ្មានរបួស (អ្នកទេសចរ)។ ០៥-ឈ្មោះ Nguy En Thuc ភេទប្រុស អាយុ ៣៤ ឆ្នាំ ជនជាតិវៀតណាម គ្មានរបួស (អ្នកទេសចរ)។ ពួកគេស្នាក់នៅផ្ទះលេខ ២៩ សង្កាត់ផ្សារចាស់ ខណ្ឌដូនពេញ រាជធានីភ្នំពេញ។

ដោយឡែកសម្ភារៈដកហូតរួមមាន ៖ ០១-រថយន្តម៉ាក TOYOTA PRUS ពណ៌ស ស៊េរីឆ្នាំ ២០០៩ ផ្លាកលេខ ភ្នំពេញ 2BY-0379 ចំនួន ០១ គ្រឿង។ ០២-ម៉ូតូម៉ាក EROX ពណ៌ប្រផេះ ស៊េរីឆ្នាំ ២០១៨ ផ្លាកលេខ ភ្នំពេញ 1HT-4412 ចំនួន ០១ គ្រឿង។

បច្ចុប្បន្នភាគីទាំងពីរចំនួន ០៦ នាក់ រួមទាំងមធ្យោបាយរថយន្ត និងម៉ូតូ ឃាត់ខ្លួន និងរក្សាទុកបណ្ដោះអាសន្ននៅផ្នែកជំនាញព្រហ្មទណ្ឌអធិការដ្ឋាននគរបាលខណ្ឌជ្រោយចង្វារ ដើម្បីស្រាវជ្រាវបន្ត៕

អត្ថបទ ៖ សុខា