ចរាចរណ៍

ម៉ូតូ ៣ គ្រឿង បុកគ្នា រងរបួសធ្ងន់-ស្រាល ៥ នាក់

បានផុស

៣៥ នាទី មុន

នៅ

ថ្ងៃពុធ ១៦ តុលា ២០២៤

ដោយ

ម៉ូតូចំនួន ៣ គ្រឿង បានបុកគ្នាពេញទំហឹង បណ្ដាលឲ្យមនុស្ស ៥ នាក់ រងរបួសធ្ងន់ និងស្រាល ត្រូវបានក្រុមសង្គ្រោះអង្គភាព ៧១១ ដឹកយកទៅកាន់មន្ទីរពេទ្យ ដើម្បីសង្គ្រោះបន្ទាន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបានកើតឡើងកាលពីវេលាម៉ោង ១១ និង ២០ នាទីព្រឹក ថ្ងៃទី ១៦ ខែតុលា ឆ្នាំ ២០២៤ នៅតាមផ្លូវជាតិលេខ ៣ មុខស្ថានីយប្រេងឥន្ធនៈសមប្រាថ្នា ភូមិព្រៃព្រីងត្បូង ២ សង្កាត់ចោមចៅទី ៣ ខណ្ឌពោធិ៍សែនជ័យ។

តាមប្រភពពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញម៉ូតូម៉ាកហុងដាឌ្រីមសេ ១២៥ ពណ៌ខ្មៅ ១ គ្រឿង ពាក់ស្លាកលេខកំពង់ស្ពឺ 1S-0874 ជិះគ្នា ៣ នាក់ បើកបរដោយបុរសម្នាក់ ដឹកកូន និងចៅ ធ្វើដំណើរស្របគ្នាជាមួយម៉ូតូ ១ គ្រឿងទៀត ម៉ាក Ginio ពណ៌ខ្មៅ ពាក់ស្លាកលេខភ្នំពេញ 1KC-4161 ជិះម្នាក់ឯង ក្នុងទិសដៅពីជើងទៅត្បូង។

ប្រភពដដែលបានឲ្យដឹងបន្តទៀតថា លុះពេលទៅដល់ត្រង់ចំណុចកើតហេតុ ម៉ូតូទាំង ២ គ្រឿង បានបត់ឆ្វេងត្រឡប់ក្រោយ ស្របពេលនោះមានម៉ូតូ ១ គ្រឿងទៀត ម៉ាកហុងដាឌ្រីមសេ ១២៥ ពណ៌ខ្មៅ ១ គ្រឿង ពាក់ស្លាកលេខភ្នំពេញ 1KR-6170 បើកបរដោយសិស្សសាលាម្នាក់ ក្នុងល្បឿនលឿនទៅដល់បុកពេញទំហឹង បណ្ដាលឲ្យបុរសអ្នកជិះម៉ូតូម៉ាកហុងដាឌ្រីម ពាក់ស្លាកលេខកំពង់ស្ពឺ 1S-0874 រងរបួសបាក់ជើងលៀនឆ្អឹងចេញក្រៅ កូនស្រីរលាត់មុខមាត់ និងចៅប្រុសរលាត់ដៃជើង។

ប្រភពខាងលើបានឲ្យដឹងទៀតថា ចំពោះអ្នកជិះម៉ូតូម៉ាក Ginio និងសិស្សសាលាដែលជាអ្នកជិះម៉ូតូហុងដាឌ្រីម ពាក់ស្លាកលេខភ្នំពេញ 1KR-6170 រងរបួសស្រាលប៉ុណ្ណោះ បន្ទាប់មកអ្នករបួសធ្ងន់ត្រូវបានក្រុមសង្គ្រោះអង្គភាព ៧១១ ដឹកយកទៅកាន់មន្ទីរពេទ្យ ដើម្បីសង្គ្រោះបន្ទាន់។

ក្រោយពេលកើតហេតុ នគរបាលប៉ុស្តិ៍ចោមចៅទី ៣ និងនគរបាលខណ្ឌពោធិ៍សែនជ័យ បានចុះទៅធ្វើការវាស់វែង និងនាំយកម៉ូតូទាំង ៣ គ្រឿង រក្សាទុក រង់ចាំការដោះស្រាយនៅពេលក្រោយ៕

អត្ថបទ ៖ សំណាង