ចរាចរណ៍

រថយន្ត Discovery ពន្លះគ្នាជាមួយ រថយន្ត អាល់ហ្វាត នៅស្តុបព្រះសក្យមុនីចេតិយ

បានផុស

៤ ខែ មុន

នៅ

ថ្ងៃអង្គារ ២២ តុលា ២០២៤

ដោយ

ជម្លោះទាស់សម្ដីរវាងម្ចាស់រថយន្តស៊េរីទំនើប ២ គ្រឿង ប្រកែកយកឈ្នះចាញ់ បន្ទាប់ពីបុកគ្នានៅផ្លូវបំបែកជាបួន បង្កការភ្ញាក់ផ្អើល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបានកើតឡើងកាលពីវេលាម៉ោង ២ រំលងអធ្រាត្រ ឈានចូលថ្ងៃទី ២២ ខែតុលា ឆ្នាំ ២០២៤ ស្ថិតនៅមហាវិថីព្រះមុនីវង្ស ស្តុបព្រះសក្យមុនីចេតិយ សង្កាត់វត្តភ្នំ ខណ្ឌដូនពេញ រាជធានីភ្នំពេញ។

តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ មានរថយន្ត Discovery ពណ៌ស ១ គ្រឿង ពាក់ស្លាកលេខ ភ្នំពេញ 2AX-2277 បើកបរដោយបុរសម្នាក់ ធ្វើដំណើរតាមបណ្ដោយផ្លូវលេខ ១០៨ ទិសដៅពីលិចទៅកើត គោលបំណងឆ្លងស្តុប។ លុះឆ្លងបានពាក់កណ្ដាលផ្លូវ ស្រាប់តែមានរថយន្ត អាល់ហ្វាត ១ គ្រឿងទៀត ពណ៌ស ដែលមានស្លាកលេខ កម្ពុជា LIHENG99 បើកបរដោយបុរសម្នាក់ ធ្វើដំណើរតាមបណ្ដោយមហាវិថីព្រះមុនីវង្ស ទិសដៅពីត្បូងទៅជើង ឆ្លងស្តុបដូចគ្នា។

ប្រភពបន្តថា ភ្លាមៗ នោះ រថយន្ត Discovery ក៏បានបុកអាល់ហ្វាតនោះពេញទំហឹង ត្រង់ចំហៀងខាងឆ្វេង បណ្ដាលឲ្យរថយន្តទាំង ២ គ្រឿង រងការខូចខាតទាំងសងខាង។ បន្ទាប់មក រថយន្តអាល់ហ្វាត មិនទាន់អស់ល្បឿន ក៏បានទៅមុខប្រមាណ ១០ ម៉ែត្រ ស្រាប់តែភាគីខាង Discovery បើកដេញតាមស្ទាក់ពីមុខ ព្រោះខ្លាចអាល់ហ្វាតនោះរត់គេច។

ក្រោយកើតហេតុ ភាគីទាំងសងខាង ក៏បានជជែកគ្នា រកខុសត្រូវរៀងខ្លួន ប៉ុន្តែមិនអាចដោះស្រាយគ្នាបាន ឈានដល់ការតឹងសរសៃកដាក់គ្នា ផ្អើលប្រជាពលរដ្ឋរាយការណ៍ជូនសមត្ថកិច្ចមូលដ្ឋាន។

ក្រោយទទួលដំណឹងនេះ សមត្ថកិច្ចមូលដ្ឋាន បានទាក់ទងទៅកាន់សមត្ថកិច្ចជំនាញចរាចរណ៍ ដើម្បីចុះមកធ្វើការវាស់វែង និងយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំម្ចាស់រថយន្តចូលខ្លួនទៅដោះស្រាយតាមនីតិវិធីច្បាប់ នៅពេលក្រោយ៕

អត្ថបទ ៖ សំណាង