អ្នកបើកម៉ូតូកង់បីឥណ្ឌាម្នាក់ត្រូវរថយន្ដដឹកទំនិញ​បុកពីក្រោយស្លាប់ទាំងព្រឹកនៅផ្លូវ៦០ម៉ែត្រ

បុរសអុ្នកបើកម៉ូតូកង់បីម្នាក់បានជួបគ្រោះថ្នាក់ចរាចរណ៍ស្លាប់ទាំងព្រឹកព្រលឹម ខណៈពេលកំពុងដឹកភ្ញៀវធើ្វដំណើរតាមផ្លូវត្រូវរថយន្តដឹកទំនិញធុនតូចបុកពីក្រោយបណ្ដាលឲ្យក្រឡាប់កក្បាលទៅនឹងថ្នល់ស្លាប់ភ្លាមៗនៅនឹងកន្លែង។

ហេតុការណ៍នេះកើតឡើងកាលពីវេលាម៉ោង៥និង៣០នាទីព្រឹកថ្ងៃទី២៥ ខែតុលា ឆ្នាំ២០២៤ នៅតាមបណ្តោយផ្លូវ៦០ម៉ែត្រ ភូមិព្រែកតាឡុង៣ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ។

បើតាមប្រភពពីកន្លែងកើតហេតុបានអោយដឹងថា គេបានឃើញបុរសម្នាក់បើកម៉ូតូកង់បីឥណ្ឌាមួយគ្រឿងពាក់ស្លាកលេខ តាកែវ 1S-0304 ពណ៌លឿង កំពុងដឹកភ្ញៀវធើ្វដំណើរតាមផ្លូវ៦០ម៉ែត្រ ក្នុងទិសដៅពីត្បូងមកជើង លុះមកដល់ចំនុចកើតហេតុត្រង់ចំណុចភ្លើងស្តុប ស្រាប់តែមានរថយន្តមួយគ្រឿងម៉ាកKIA ពាក់ផ្លាកលេខ ភ្នំពេញ 2BF-9739 ធើ្វដំណើរស្របទិសគ្នា បានជ្រុលទៅបុកពីក្រោយពេញទំហឹងបណ្ដាលឲ្យស្លាប់អ្នកបើកបរភ្លាមៗ រីឯភ្ញៀវដែលនៅក្នុងកង់បីរងរបួសធ្ងន់ត្រូវបានដឹកទៅសង្រ្គោះនៅមន្ទីរពេទ្យ ចំណែកអ្នកបើកបររថយន្តបានចុះរត់គេចខ្លួនបាត់ស្រមោល ។

ក្រោយកើតហេតុសមត្ថកិច្ចមូលដ្ឋានបានសហការជាមួយសមត្ថកិច្ចជំនាញចុះវាស់វែងអូសយករថយន្ត និងម៉ូតូកង់បីទៅរក្សាទុកនៅការិយាល័យចរាចរផ្លូវគោកនៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយនាពេលក្រោយ​ចំណែកសពជនរងគ្រោះយកទៅតម្កល់ទុកនៅវត្តរង់ចាំក្រុមគ្រួសារសាច់ញាតិមកទទួលយកធ្វើបុណ្យតាមប្រពៃណី៕

អត្ថបទ៖ ម៉េង