ចរាចរណ៍

ហ៊ីយ៉ាន់ដាយ គេចពីរ៉ឺម៉ក ជ្រុលឡើងសួនពុះចែកទ្រូងផ្លូវបុកបង្គោលភ្លើង បាក់ត្រូវកាមរីបាឡែនមួយគ្រឿងទៀត

បានផុស

៣ ខែ មុន

នៅ

ថ្ងៃចន្ទ ២៨ តុលា ២០២៤

ដោយ

រថយន្តដឹកឥដ្ឋ ១ គ្រឿង ខណៈបើកបរគេចម៉ូតូសណ្ដោងរ៉ឺម៉កលក់បន្លែ ក៏រេចង្កូតទៅបុកឡើងសួនច្បារពុះចែកទ្រូងផ្លូវ បុកបង្គោលភ្លើង ១ ដើម បាក់ដួលបោកត្រូវរថយន្តកាមរីបាឡែន ១ គ្រឿងទៀត រងការខូចខាត កាលពីវេលាម៉ោង ១១ និង ៣០ នាទី ព្រឹកថ្ងៃទី ២៨ ខែតុលា ឆ្នាំ ២០២៤ នៅតាមមហាវិថីឈ្នះឈ្នះ ភូមិត្រពាំងធ្នង់ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមប្រភពពីកន្លែងកើតហេតុបានឱ្យដឹងថា មុនពេលកើតហេតុគេបានឃើញរថយន្តម៉ាកហ៊ីយ៉ាន់ដាយ ពណ៌ស ពាក់ស្លាកលេខ យ 1483 ភព 1 ដឹកឥដ្ឋ បើកបរដោយបុរសម្នាក់ ក្នុងល្បឿនលឿនពីជើងទៅត្បូងស្របទិសគ្នាជាមួយម៉ូតូសណ្ដោងរ៉ឺម៉កដឹកបន្លែ ១ គ្រឿង។ លុះពេលទៅដល់ត្រង់ចំណុចកើតហេតុ ម៉ូតូសណ្ដោងរ៉ឺម៉កដឹកបន្លែ គេចការដ្ឋានជួសជុលផ្លូវ ហើយរថយន្តដឹកឥដ្ឋបានគេចចេញពីម៉ូតូសណ្ដោងរ៉ឺម៉កដឹកបន្លែនោះដែរ ដែលកំពុងបើកបរខាងមុខរថយន្ត ទើបបណ្ដាលឱ្យរេចង្កូតបុកឡើងសួនច្បារពុះចែកទ្រូងផ្លូវ។

ប្រភពដដែលបានឱ្យដឹងបន្តថា ខណៈនោះរថយន្តបង្កបានបុកបង្គោលភ្លើងបំភ្លឺផ្លូវ ១ ដើម បណ្ដាលឱ្យបាក់ដួលទៅចំណែកផ្លូវម្ខាងទៀតបោកត្រូវរថយន្តម៉ាកកាមរីបាឡែន ដែលកំពុងបើកបរក្នុងទិសដៅបញ្ច្រាសគ្នាពីត្បូងទៅជើង រងការខូចខាតកាងមុខ ប៉ុន្តែជាសំណាងល្អពុំបានបណ្ដាលឱ្យមានអ្នករងរបួសឡើយ ហើយក្រោយពេលកើតហេតុ អ្នកបើកបររថយន្តដឹកឥដ្ឋបានចេញសំណង ៥ ម៉ឺនរៀល ទៅម្ចាស់រថយន្តកាមរីបាឡែន ដើម្បីបញ្ចប់រឿង។ ចំណែករថយន្តដឹកឥដ្ឋ ត្រូវបាននគរបាលការិយាល័យចរាចរណ៍ផ្លូវគោក នៃស្នងការដ្ឋានរាជធានីភ្នំពេញ ចុះទៅធ្វើការវាស់វែងនាំយកទៅរក្សាទុកចាត់តាមច្បាប់៕

អត្ថបទ ៖ សុខា