រថយន្តកុងតឺន័របុកម៉ូតូ១គ្រឿងឈប់ចាំស្តុបបណ្ដាល​ឲ្យមន្ត្រីយោធាម្នាក់ និងស្ត្រីម្នាក់ស្លាប់ទាំងព្រឹកក្រោមរថយន្ដ

រថយន្តកុងតឺន័រមួយគ្រឿងសង្ស័យដាច់ហ្វ្រាំងជ្រុលទៅបុកម៉ូតូ១គ្រឿងកំពុងឈប់រង់ចាំភ្លើងស្តុបអូសជាច្រើនម៉ែត្របណ្ដាលឲ្យបុរសម្នាក់ជាមន្ត្រយោធា និងស្ត្រីម្នាក់ស្លាប់ភ្លាមៗក្រោមរថយន្ដទាំងព្រឹក។

ហេតុការណ៍នេះកើតឡើងនៅវេលាម៉ោង៨ព្រឹក ថ្ងៃទី៣០ ខែតុលា ឆ្នាំ២០២៤ ត្រង់ចំណុចផ្លូវចូលផ្សារព្រែកព្នៅ ស្ថិតតាមបណ្ដាលផ្លូវជាតិលេខ៥ ក្នុងសង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ ។

បើតាមប្រភពពីកន្លែងកើតហេតុបានអោយដឹងថា មុនពេលកើតហេតុគេបានឃើញបុរសម្នាក់ជិះម៉ូតូមួយគ្រឿងម៉ាក​Honda Dream ឆ្នាំ២០១៣ ពាក់ស្លាកលេខ ភ្នំពេញ1BX -7170 ដឹកស្ត្រីម្នាក់បើកបរក្នុងទិសដៅពីជើងទៅត្បូង លុះមកដល់ចំណុចកើតហេតុច្រកចូលផ្សារព្រែកព្នៅបានឈប់រង់ចាំភ្លើងស្តុប ក៏មានរថយន្តកុងទីន័រមួយគ្រឿងពាក់ស្លាកលេខ ព្រៃវែង 3A-2736 បើកស្របទិសគ្នាជាមួយម៉ូតូមកពីក្រោយសង្ស័យហ្វ្រាំងបុកពេញទំហឹងអូសជាច្រើនម៉ែ្រតម៉ូតូផ្នែកខាងក្រោយខូចខាតតែទាំងស្រុងមើលស្លាកលេខលែងយល់បណ្ដាលឲ្យស្លាប់ក្រោមរថយន្តទាំង២នាក់។ ភ្លាមៗប្រជាពលរដ្ឋបានឃាត់អ្នកបើកបររថយន្តប្រគល់ជូនសមត្ថកិច្ច ។

ជនរងគ្រោះឈ្មោះ ខន មូនី ភេទប្រុស អាយុ២៩ឆ្នាំ មុខរបរមន្រី្តយោធា ស្នាក់នៅបច្ចុប្បន្នសង្កាត់ផ្សារកណ្តាល១ ខណ្ឌដូនពេញ រាជធានីភ្នំពេញ ចំណែកម្នាក់ទៀតមិនទាន់ស្គាល់អត្តសញ្ញាណ។

ក្រោយពេលកេីតហេតុសមត្ថកិច្ចជំនាញចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ចុះមកធ្វើការវាស់វែងយករថយន្ត និងម៉ូតូទៅរក្សាទុករង់ចាំការដោះស្រាយនៅពេលក្រោយ។ រីឯសពជនរងគ្រោះប្រគល់ឲ្យសាច់ញាតយកទៅធ្វើបុណ្យតាមប្រពៃណី៕

អត្ថបទ៖ ម៉េង