ចរាចរណ៍

ជិះម៉ូតូលឿនឱនលើកទូរសព្ទ ជ្រុលបុកសួនចែកទ្រូងផ្លូវ រងរបួសធ្ងន់ម្នាក់ និងស្រាលម្នាក់

បានផុស

៤ ខែ មុន

នៅ

ថ្ងៃព្រហស្បតិ៍ ៣១ តុលា ២០២៤

ដោយ

យុវជន ២ នាក់ ជិះម៉ូតូទៅលេងផ្ទះមិត្តភ័ក្ដិទាំងកណ្ដាលយប់ ក្នុងល្បឿនយ៉ាងលឿន ខណៈអ្នកឌុបឱនលើកទូរស័ព្ទ ក៏ជ្រុលបុកសួនចែកទ្រូងផ្លូវ បណ្ដាលឲ្យដួលបោករងរបួសធ្ងន់ម្នាក់ និងស្រាលម្នាក់ ត្រូវបានរថយន្តសង្គ្រោះបន្ទាន់របស់កងពលតូចលេខ ៧០ ដឹកយកទៅសង្គ្រោះបន្ទាន់ភ្លាមៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង ២ រំលងអធ្រាត្រ ឈានចូលថ្ងៃទី ៣១ ខែតុលា ឆ្នាំ២០២៤ នៅតាមបណ្ដោយផ្លូវជាតិលេខ ៣ ភូមិក្រាំងដូនទៃ សង្កាត់ចោមចៅទី ២ ខណ្ឌពោធិ៍សែនជ័យ រាជធានីភ្នំពេញ។

តាមប្រភពព័ត៌មានពីកន្លែងកើតហេតុបាននិយាយប្រាប់ថា មុនកើតហេតុគេឃើញយុវជន ២ នាក់ ជិះម៉ូតូមួយគ្រឿង ម៉ាកឌ្រីមសង់ ស៊េរី ២០២៤ ពណ៌ខ្មៅ ពាក់ស្លាកលេខ ភ្នំពេញ 1KP-3874 បើកតាមបណ្ដោយផ្លូវជាតិលេខ ៣ ទិសដៅពីជើងទៅត្បូងក្នុងល្បឿនយ៉ាងលឿន លុះមកដល់ចំណុចកើតហេតុអ្នកឌុបបានឱនលើកទូរសព្ទ ក៏ស្រាប់តែម៉ូតូរងគ្រោះរ៉េចង្កូតទៅផ្នែកខាងស្ដាំឡើងទ្រូងផ្លូវបណ្ដាលឲ្យដួលម៉ូតូបោករងរបួសក្បាលធ្ងន់ និងម្នាក់ទៀតរងរបួសស្រាល។

ចំណែកជនរងគ្រោះរងរបួសស្រាលគាត់បាននិយាយប្រាប់ថា ពួកគាត់ជាបងប្អូនជីដូនមួយ ហើយថាទៅលេងផ្ទះមិត្តភ័ក្ដិដែលទើបទិញម៉ូតូថ្មី ទើបពួកគាត់នាំគ្នាទៅលេង។

ក្រោយពេលកើតហេតុជនរងគ្រោះរងរបួសធ្ងន់បែកក្បាលធ្លាយខួរ ត្រូវបានរថយន្តសង្គ្រោះរបស់អង្គភាព ៧១១ ដឹកយកទៅសង្គ្រោះបន្ទាន់ភ្លាមៗ នៅមន្ទីរពេទ្យកម្ពុជា-ចិន ព្រះកុសុមៈ។ ចំណែកជនរងគ្រោះរងរបួសស្រាល បានជិះម៉ូតូតាមរថយន្តទៅមើលជនរងគ្រោះរងរបួសធ្ងន់៕

អត្ថបទ ៖ សំណាង