ចរាចរណ៍

បើកបរក្នុងស្ថានភាពស្រវឹង! រថយន្ត តូយ៉ូតា BZ4X បុកក្បាលនាគថ្មពុះចែកទ្រូងផ្លូវ ទៅមុខលែងរួច

បានផុស

៤ ខែ មុន

នៅ

ថ្ងៃសុក្រ ១ វិច្ឆិកា ២០២៤

ដោយ

បុរសម្នាក់ ជាអ្នកបើកបររថយន្ត និងមិត្តភ័ក្ដិរួមដំណើរ បើករថយន្ត តូយ៉ូតា BZ4X ស៊េរីទំនើបមួយគ្រឿង ក្នុងស្ថានភាពស្រវឹង ក៏ជ្រុលបុកក្បាលនាគថ្មពុះចែកទ្រូងផ្លូវ បណ្ដាលឲ្យរងការខូចខាតទៅមុខលែងរួច ហើយត្រូវសមត្ថកិច្ចឃាត់យកទៅប៉ុស្តិ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបានកើតឡើងកាលពីវេលាម៉ោង ៩ យប់ ថ្ងៃទី ៣១ ខែតុលា ឆ្នាំ ២០២៤ ជិតស្តុបស្ថានទូតចិន ផ្លូវម៉ៅសេទុង សង្កាត់ទួលស្វាយព្រៃទី ១ ខណ្ឌបឹងកេងកង រាជធានីភ្នំពេញ។

តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេបានឃើញបុរស ២ នាក់ មិនដឹងថាចេញពីកម្មវិធីជួបជុំនៅទីណានោះទេ ដោយបើករថយន្តស៊េរីទំនើបម៉ាកតូយ៉ូតា BZ4X ឆ្នាំ 2023 ពាក់ស្លាកលេខ ភ្នំពេញ 2CC.6263 ធ្វើដំណើរតាមបណ្ដោយផ្លូវម៉ៅសេងទុង ទិសដៅពីត្បូងទៅជើង លុះមកដល់ចំណុចកើតហេតុ ដោយសារតែអ្នកបើកបរស្រវឹង ទើបធ្វើឲ្យរថយន្តរេចង្កូតជ្រុលទៅបុកនឹងក្បាលនាគថ្មពុះចែកទ្រូងផ្លូវ បណ្ដាលឲ្យខ្ទាតអស់មួយកង់ទៅផ្លូវម្ខាងទៀត ព្រមទាំងធ្វើឲ្យរថយន្តរងការបាក់រូទិលកង់មុខចំហៀងខាងឆ្វេងទៅមុខលែងរួច។

ហេតុការណ៍នេះដែរ មិនបង្កឲ្យគ្រោះថ្នាក់ដល់មនុស្សនោះទេ គ្រាន់តែអ្នកបើកបរស្ថិតក្នុងស្ថានភាពស្រវឹង ក៏ត្រូវកម្លាំងសមត្ថកិច្ចឃាត់ខ្លួនយកទៅអធិការដ្ឋាននគរបាលខណ្ឌបឹងកេងកង រង់ចាំប្រគល់ឲ្យផ្នែកជំនាញចរាចរណ៍។

ក្រោយពេលកើតហេតុ រថយន្ត និងអ្នកបើកបរ ត្រូវបានសមត្ថកិច្ចជំនាញចរាចរណ៍ស្ទូចយកទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋានរាជធានីភ្នំពេញ ដើម្បីរង់ចាំដំណោះស្រាយ៕

អត្ថបទ ៖ សំណាង