ចរាចរណ៍

យុវជនប្រុស-ស្រី ៣ នាក់ ជិះម៉ូតូលឿន ជ្រុលបុករថយន្តឆ្លងផ្លូវ រងរបួសធ្ងន់-ស្រាល

បានផុស

៥ ខែ មុន

នៅ

ថ្ងៃព្រហស្បតិ៍ ៧ វិច្ឆិកា ២០២៤

ដោយ

យុវជនប្រុស-ស្រី ៣ នាក់ រងរបួសធ្ងន់ និងស្រាល ត្រូវបានរថយន្តសាមុយដឹកទៅសង្គ្រោះបន្ទាន់ភ្លាមៗ បន្ទាប់ពីពួកគេជិះម៉ូតូឌុបគ្នាយ៉ាងលឿន ជ្រុលបុករថយន្តមួយគ្រឿង ដែលបត់ឆ្លងផ្លូវ យ៉ាងពេញទំហឹង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង ១១ និង ៣០ នាទីយប់ ថ្ងៃទី ៦ ខែវិច្ឆិកា ឆ្នាំ ២០២៤ ស្ថិតតាមបណ្ដោយផ្លូវសហព័ន្ធរុស្ស៊ី ភូមិព្រៃទា សង្កាត់ចោមចៅទី ៣ ខណ្ឌពោធិ៍សែនជ័យ រាជធានីភ្នំពេញ។

តាមប្រភពនៅកន្លែងកើតហេតុបានឲ្យដឹងថា គេបានឃើញយុវជនទាំង ៣ នាក់ ខាងលើ ជិះម៉ូតូមួយគ្រឿង ម៉ាកឌ្រីមសង់ ពាក់ស្លាកលេខភ្នំពេញ 1KP-6499 តាមបណ្ដោយផ្លូវសហព័ន្ធរុស្ស៊ី ទិសដៅពីកើតទៅលិច ក្នុងល្បឿនយ៉ាងលឿន។ ក្នុងនោះ ខណៈពេលជិះមកដល់ចំណុចកើតហេតុ ស្រាប់តែមានរថយន្តមួយគ្រឿង មិនស្គាល់ម៉ាក ធ្វើដំណើរទិសដៅពីលិចមកកើត ហើយបត់ឆ្លងផ្លូវ ក៏ជ្រុលបុកគ្នានឹងម៉ូតូយ៉ាងពេញទំហឹង បណ្ដាលឲ្យម៉ូតូដួលផ្លោងទៅចិញ្ចើមផ្លូវ ធ្វើឲ្យយុវជនប្រុស-ស្រីចំនួន ៣ នាក់ រងរបួសធ្ងន់-ស្រាល។ ក្នុងនោះដែរ យុវតីម្នាក់ បាក់ជើងឆ្វេងចេញឆ្អឹង ត្រូវបានរថយន្តសាមុយដឹកទៅសង្គ្រោះបន្ទាន់ភ្លាមៗ ផងដែរ។ រីឯរថយន្តបង្ក បានបើករត់គេចខ្លួនបាត់ស្រមោល។

ក្រោយកើតហេតុជនរងគ្រោះត្រូវបានក្រុមសង្គ្រោះ ៧១១ កងពលតូចលេខ ៧០ ដឹកតាមរថយន្តទៅព្យាបាលនៅមន្ទីរពេទ្យព្រះកុសុមៈ។ ដោយឡែកសមត្ថកិច្ចមូលដ្ឋានសហការជាមួយនឹងជំនាញ ចុះទៅដល់ធ្វើការវាស់វែងយកម៉ូតូជនរងគ្រោះទៅរក្សាទុកជាបណ្ដោះអាសន្ន។ ចំណែកឯរថយន្តបង្ក សមត្ថកិច្ច នឹងធ្វើការស្រាវជ្រាវនៅពេលក្រោយតាមឃាត់យកមកចាត់ការតាមនីតិវិធីច្បាប់៕

អត្ថបទ ៖ សំណាង