ចរាចរណ៍

បុរសម្នាក់ បើករថយន្តដឹកបន្លែសុខៗ ស្រាប់តែគាំងបេះដូងស្លាប់ នៅកណ្ដាលផ្លូវ

បានផុស

៤ ខែ មុន

នៅ

ថ្ងៃពុធ ១៣ វិច្ឆិកា ២០២៤

ដោយ

បុរសម្នាក់ ដឹកបន្លែយកឲ្យប្រពន្ធលក់នៅផ្សារអូឌឹម ស្រាប់តែមកដល់ចំណុចស្តុបទឹកល្អក់ ផ្លូវកម្ពុជាក្រោម បានគាំងបេះដូងស្លាប់ភ្លាមៗ ចំណែករថយន្តឈប់នៅកណ្ដាលផ្លូវតែម្ដង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបានកើតឡើងកាលពីវេលាម៉ោង ៣ និង ៤០ នាទី ថ្ងៃទី ១៣ ខែវិច្ឆិកា ឆ្នាំ ២០២៤ នៅចំណុចស្តុបទឹកល្អក់ តាមបណ្ដោយមហាវិថីកម្ពុជាក្រោម សង្កាត់ទឹកល្អក់ទី ២ ខណ្ឌទួលគោក រាជធានីភ្នំពេញ។

ជនរងគ្រោះវ័យប្រមាណជា ៤០ ឆ្នាំ មានជំងឺមហារីកបេះដូង មុខរបរដឹកអីវ៉ាន់ បន្លែ ផ្លែឈើ ឲ្យប្រពន្ធលក់ដូរនៅផ្សារអូឌឹម។

តាមប្រភពព័ត៌មាននៅកន្លែងកើតហេតុបានប្រាប់ឲ្យដឹងថា មុនពេលកើតហេតុ គេបានឃើញជនរងគ្រោះបើករថយន្តមួយគ្រឿង ម៉ាកសាំងយ៉ុង ពណ៌ស្លែ ពាក់ស្លាកលេខ ភ្នំពេញ 2Q-6180 បើកបរតាមបណ្ដោយមហាវិថី កម្ពុជាក្រោម ក្នុងទិសដៅពីលិចទៅកើត។

ប្រភពព័ត៌មានដដែលបន្តថា ខណៈមកដល់ចំណុចកើតហេតុ ស្រាប់តែរថយន្តរបស់ជនរងគ្រោះបានឈប់នៅកណ្ដាលផ្លូវ។ ពេលនោះ ប្រជាពលរដ្ឋបាននាំគ្នាទៅមើល រួចក៏ឃើញជនរងគ្រោះកំពុងគាំងបេះដូង ស្លេកមុខ ស្លេកមាត់ រហូតដាច់ខ្យល់ស្លាប់មួយរំពេចតែម្ដង ដោយគ្មាននរណាម្នាក់ជួយគាត់បាននោះទេ។

ស្ត្រីជាប្រពន្ធជនរងគ្រោះបានបញ្ជាក់ថា ប្ដីរបស់គាត់មានជំងឺមហារីកបេះដូង សព្វថ្ងៃប្រកបរបរលក់បន្លែផ្លែឈើនៅផ្សារអូឌឹម។ រៀងរាល់វេលាម៉ោង ២ ឬ ៣ យប់ ទៀបភ្លឺ ប្ដីរបស់គាត់តែងបើករថយន្តទៅផ្សារដើមគរ លើកបន្លែ និងអំពិលទុំ ដើម្បីយកឲ្យគាត់ជាប្រពន្ធលក់ដូរនៅផ្សារអូឌឹមជារៀងរាល់យប់។

ប្រពន្ធជនរងគ្រោះបញ្ជាក់ទៀតថា នៅយប់កើតហេតុនេះ ប្ដីរបស់គាត់បានចេញពីផ្ទះដោយបើករថយន្តមកដឹកបន្លែដូចសព្វដង។ មិនយូរប៉ុន្មានផង មានគេទំនាក់ទំនងតាមរយៈប្រព័ន្ធទូរស័ព្ទមកថា ប្ដីរបស់គាត់បានគាំងបេះដូងស្លាប់នៅតាមផ្លូវតែម្ដង។

ក្រោយពេលកើតហេតុ កម្លាំងសមត្ថកិច្ច បានចុះមកដល់ចំណុចកើតហេតុ រួចធ្វើលិខិតដើម្បីប្រគល់សពជូនក្រុមគ្រួសារយកទៅធ្វើបុណ្យតាមប្រពៃណី៕

អត្ថបទ ៖ ម៉េង