ចរាចរណ៍

ស្ត្រីម្នាក់ ជិះម៉ូតូឆ្លងស្តុប ត្រូវរថយន្តធុនធំបួងចង្កូតបត់ បុក និងកិន ស្លាប់

បានផុស

៤ ខែ មុន

នៅ

ថ្ងៃចន្ទ ៩ ធ្នូ ២០២៤

ដោយ

ស្ត្រីម្នាក់ បាត់បង់ជីវិតភ្លាមៗ នៅក្រោមកង់រថយន្ត ខណៈជិះម៉ូតូឆ្លងស្តុប ត្រូវរថយន្តដឹកទំនិញធុនធំ បើកមកបញ្ច្រាសទិសគ្នា បួងចង្កូតបត់ បុក និងកិន រួចអ្នកបើកបរបានរត់គេច តែត្រូវប្រជាពលរដ្ឋឃាត់បានប្រគល់ឱ្យសមត្ថកិច្ចនគរបាលមូលដ្ឋាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបានកើតឡើងកាលពីវេលាម៉ោង ៣ ទៀបភ្លឺ ព្រឹកថ្ងៃទី ៩ ខែធ្នូ ឆ្នាំ ២០២៤ នៅចំណុចស្តុក ណូគា ផ្លូវ ២៧១ សង្កាត់អូរបែកក្អម ខណ្ឌសែនសុខ រាជធានីភ្នំពេញ។

សពមានឈ្មោះ ម៉ុន លីយ៉ា ភេទស្រី អាយុ ៣១ ឆ្នាំ រស់នៅភូមិព្រែកតូច ឃុំទន្លាប់ ស្រុកលើកដែក ខេត្តកណ្តាល។ ជិះម៉ូតូម៉ាកហុងដាស្កុបពី ពណ៌ក្រហម ពាក់ស្លាកលេខ 1JH-7447។ រីឯរថយន្តម៉ាក ហ៊ីយ៉ាន់ដាយ ដឹកទំនិញធុនធំ ពណ៌ស ពាក់ស្លាកលេខ ភ្នំពេញ 3E-3792។

ប្រភពពីកន្លែងកើតហេតុបានឱ្យដឹងថា នៅមុនពេលកើតហេតុ គេឃើញនារីរងគ្រោះជិះម៉ូតូ តែម្នាក់ឯង ធ្វើដំណើរតាមបណ្ដោយផ្លូវ ២៧១ ទិសដៅពីជើងទៅត្បូង ក្នុងល្បឿនលឿន ឆ្លង ស្តុប ខណៈពេលឆ្លងដល់ពាក់កណ្ដាលភ្លើងស្តុប ស្រាប់តែឃើញមានរថយន្តម៉ាក ហ៊ីយ៉ាន់ដាយ ដឹកទំនិញធុនធំ ១ គ្រឿង បើកបរដោយបុរសម្នាក់ ទិសដៅបញ្ច្រាសគ្នា ពីត្បូងទៅជើង ខណៈបើកមកដល់ចំណុចកើតហេតុ រថយន្តបានបួងចង្កូតបត់ឆ្វេងឆ្ពោះទៅតាមផ្លូវ ២០០៤ បណ្ដាលឱ្យបុក និងកិនជនរងគ្រោះស្លាប់ក្រោមរថយន្ត។ ភ្លាមៗ នោះដែរ អ្នកបើករថយន្តបានបើកទ្វាររត់គេចខ្លួន តែត្រូវ ប្រជាពលរដ្ឋតាមឃាត់បានប្រគល់ទៅប៉ុស្តិ៍នគរបាលសង្កាត់អូបែកក្អម សួរនាំបន្ត។

ក្រោយកើតហេតុ សមត្ថកិច្ចមូលដ្ឋាន សហការជាមួយនឹងផ្នែកជំនាញចរាចរណ៍ ចុះមកធ្វើការវាស់វែងយករថយន្ត និងម៉ូតូ ទៅរក្សាទុកនៅការិយាល័យចរាចរណ៍ជំនាញផ្លូវគោក នៃស្នងការដ្ឋាននគរបាលរាជធានីភ្នំពេញ។ ចំណែកសពមិនទាន់មានសាច់ញាតិ សមត្ថកិច្ចឱ្យរថយន្តដឹកយកទៅតម្កល់នៅវត្តទឹកថ្លា រង់ចាំក្រុមគ្រួសារយកទៅធ្វើបុណ្យតាមប្រពៃណី៕

អត្ថបទ ៖ សំណាង