ចរាចរណ៍

រថយន្ត Jeep RUBICON បើកលឿនជ្រុលចង្កូតឡើងខឿនសួនច្បារពុះចែកទ្រូងផ្លូវ និងបុកបង្គោលភ្លើង ០១ ដើម

បានផុស

៤ ខែ មុន

នៅ

ថ្ងៃសុក្រ ១៣ ធ្នូ ២០២៤

ដោយ

រថយន្ត Jeep RUBICON ០១ គ្រឿង បើកលឿន រេចង្កូតបុកឡើងខឿនសួនច្បារពុះចែកទ្រូងផ្លូវ ជ្រុលបុកបង្គោលភ្លើង ០១ ដើម និងដើមឈើ រីឯរថយន្តរងការខូចខាតទៅមុខលែងរួច។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបានកើតឡើងកាលពីវេលាម៉ោង ០៥ ទៀបភ្លឺ ថ្ងៃទី ១៣ ខែធ្នូ ឆ្នាំ ២០២៤ ស្ថិតតាមបណ្ដោយផ្លូវជាតិលេខ ០៦ សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ។

យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេបានឃើញរថយន្ត JEEP RUBICON ០១ គ្រឿង ពណ៌ប្រផេះ មិនចាំស្លាកលេខ បានបើកបរតាមបណ្ដោយផ្លូវជាតិលេខ ០៦ ទិសដៅពីជើងទៅត្បូង លុះមកដល់ចំណុចកើតហេតុ រថយន្តខាងលើ ស្រាប់តែរេចង្កូតបុកឡើងខឿនសួនច្បារពុះចែកទ្រូងផ្លូវ បណ្ដាលឲ្យបុកបង្គោលភ្លើង ០១ ដើម វៀចខូចខាត និងប៉ះពាល់ដល់ដើមរុក្ខជាតិនៅលើសួនច្បារពុះចែកទ្រូងផ្លូវថែមទៀតផង។

អ្នកឃើញហេតុការណ៍បានបន្តថា បន្ទាប់ពីបុករួច រថយន្តខាងលើបានកល់កង់ និងរងការខូចខាតមិនអាចបន្តដំណើរទៅមុខទៀតបាន។ ភ្លាមៗ នោះ គេឃើញម្ចាស់រថយន្តចុះមកបកស្លាកលេខចេញ រួចក៏បានចេញពីទីតាំងកើតហេតុ ដោយបន្សល់ទុករថយន្តនៅកន្លែងកើតហេតុ ទើបប្រជាពលរដ្ឋនាំគ្នារាយការណ៍ជូនសមត្ថកិច្ចតែម្ដង។

ក្រោយកើតហេតុសមត្ថកិច្ចមូលដ្ឋានបានទាក់ទងទៅកាន់សមត្ថកិច្ចជំនាញចរាចរណ៍ ដើម្បីចុះមកធ្វើការវាស់វែង និងយករថយន្តបង្កទៅរក្សាទុកនៅអធិការដ្ឋាននគរបាលខណ្ឌជ្រោយចង្វារជាបណ្ដោះអាសន្ន ដើម្បីរង់ចាំម្ចាស់រថយន្តចូលខ្លួនទៅដោះស្រាយតាមនីតិវិធីច្បាប់នៅពេលក្រោយ៕

អត្ថបទ ៖ សំណាង