អ្នកដឹកជញ្ជូនម្ហូបអាហារម្នាក់ត្រូវរថយន្ដបុកស្លាប់ពេលជិះឆ្លងផ្លូវ

បុរសជាអ្នកដឹកជញ្ជូនម្ហូបអាហារម្នាក់ ត្រូវរថយន្ដម៉ាកព្រុសបុកពេញទំហឹងបណ្ដាលឲ្យបោកក្បាលស្លាប់ភ្លាមៗនៅកន្លែងកើតហេតុ ខណៈកំពុងជិះឆ្លងផ្លូវ ចំណែកអ្នកបើករថយន្ដចុះគេចខ្លួនបាត់។

ហេតុការណ៍​នេះ​បាន​កេីត​ឡេីង​កាល​ពី​វេលា​ម៉ោង​៩និង៥០នាទីយប់​ ថ្ងៃទី​២៤​ ខែ​ធ្នូ​ ឆ្នាំ​២០២៤​ ស្ថិត​តាម​បណ្ដោយ​ផ្លូវ​វេងស្រេង​ ត្រង់ចំណុចស្តុបទួលពង្រ ក្នុងសង្កាត់​ចោមចៅ​ទី១​ ខណ្ឌ​ពោធិ៍​សែន​ជ័យ​ រាជធានី​ភ្នំពេញ​។

បើតាមប្រភពពីកន្លែងកើតហេតុបានអោយដឹងថា មុនពេលកើតហេតុគេបានឃើញរថយន្តមួយគ្រឿងម៉ាក តូយូតា ព្រុស ពណ៌ផ្ទៃមេឃ ពាក់ស្លាកលេខ ភ្នំពេញ 2BK-0854 ធើ្វដំណើរក្នុងទិសដៅពីកើតទៅលិច ក្នុងល្បឿនលឿន ខណៈមកដល់ចំណុចកើតហេតុស្តុបទួលពង្ររថយន្តមិនបានបន្ថយល្បឿន ជ្រុលទៅម៉ូតូអគ្គិសនីមួយគ្រឿងពណ៌ខ្មៅ ជិះដោយបុរសម្នាក់ជាអ្នកដឹកម្ហូបអាហារពេញទំហឹង ពេលកំពុងជិះឆ្លងផ្លូវបណ្ដាលឲ្យជនរងគ្រោះដួលបោកក្បាលនឹងផ្លូវ។​ ភ្លាមៗប្រជាពលរដ្ឋនៅក្បែងនោះស្មានតែជនរងគ្រោះនៅមានជីវិតបានទាក់ទងទៅ កងពលតូចលេខ៧០ (ង៧០) ដើម្បីអោយមកជួយសង្គ្រោះតែជាអកុសល ជនរងគ្រោះបានស្លាប់បាត់បង់ជីវិតទៅហើយ។ ចំណែកអ្នកបើកបររថយន្តបានបើកចេញពីកន្លែងកើតហេតុប្រមាណជាង៥០ម៉ែត្របានចុះពីរថយន្តរួចគេចខ្លួនបាត់ស្រមោល បន្សល់រថយន្ដទុកចោល។

បើតាមការបញ្ជាក់ពីក្រុមការងារជាអ្នកដឹកម្ហូបអាហារជាមួយគ្នាបានឲ្យដឹងថា ជនរងគ្រោះមានឈ្មោះ ស សំណាង អាយុ៣០ឆ្នាំជាង មុខរបរអ្នកដឹកជញ្ជូនម្ហូបអាហារ មានស្រុកកំណើតនៅខេត្តស្វាយរៀង។ មុនពេលកើតហេតុជនរងគ្រោះទើបតែដឹកម្ហូបឲ្យភ្ញៀវនៅម្ដុំចំការដូងរួចក៏ចប់ម៉ោងបានជិះត្រលប់ទៅផ្ទះវិញ ពេលមកដល់ពាក់កណ្ដាលផ្លូវត្រូវរថយន្តបុកបណ្ដាលឲ្យស្លាប់បាត់បង់ជីវិត។

ក្រោយ​ពេល​កេីត​ហេតុ​សមត្ថកិច្ច​ជំនាញ​ចរាចរណ៍​ផ្លូវគោក​នៃ​ស្នងការដ្ឋាន​នគរបាល​រាជធានី​ភ្នំពេញ​ចុះ​​ធ្វើ​ការ​វាស់​វែង​យក​រថយន្ត​ និងម៉ូតូជនរងគ្រោះទៅ​រក្សា​ទុក​រង់ចាំ​ការ​ដោះស្រាយ​នៅ​ពេល​ក្រោយ​។ សពជនរងគ្រោះសមត្ថកិច្ចធើ្វកំណត់ហេតុប្រគល់ជូនក្រុមគ្រួសារយកទៅធើ្វបុណ្យតាមប្រពៃណី៕

អត្ថបទ៖ ម៉េង