អ្នក​​បើក​រថយន្ត​បុក​ស្លាប់៣នាក់​ឪពុក​កូន​នៅផ្លូវ៦០ម៉ែត្រ ត្រូវ​តំណាង​អយ្យការ​ចោទ​ប្រកាន់​ពី​បទ​បើកបរ​បង្ក​គ្រោះថ្នាក់​ចរាចរណ៍​បណ្តាល​ឱ្យ​អ្នក​ដទៃ​ស្លាប់ និងរបួស

ភ្នំពេញ ៖ អ្នក​នាំពាក្យ​របស់​សាលាដំបូង​រាជធានីភ្នំពេញបានចេញសេចក្តីប្រកាសព័ត៌មាន នារសៀលថ្ងៃទី១៣ ខែមករា ឆ្នាំ២០២៥នេះ ឱ្យ​ដឹង​ថា តំណាង​អយ្យការ​សម្រេចចោទប្រកាន់​អ្នកបើកបររថយន្តបង្កគ្រោះថ្នាក់ចរាចរណ៍ បណ្តាល​ឱ្យ​មនុស្ស៣នាក់ស្លាប់ និងម្នាក់ទៀតរងរបួសធ្ងន់ នៅលើផ្លូវ៦០ម៉ែត្រ។

ក្នុង​សេចក្ដី​ប្រកាស​ព័ត៌មាន តំណាង​អយ្យការ​សម្រេច​ចោទ​ប្រកាន់​អ្នកបើកបររថយន្ត ឈ្មោះ សុខ សម្បត្តិ ភេទប្រុស អាយុ៤៤ឆ្នាំ ពី​បទ​បើកបរ​បង្ក​គ្រោះថ្នាក់ចរាចរណ៍​បណ្តាល​ឱ្យអ្នកដទៃ ស្លាប់ និងរបួស តាម​បទប្បញ្ញត្តិ​មាត្រា ៨៣ កថាខណ្ឌទី២ ចំណុច ខ និង គ និង​មាត្រា ៨៥ កថាខណ្ឌទី២ ចំណុច ខ និង គ នៃច្បាប់ស្តីពីចរាចរណ៍ផ្លូវគោក។

គួរ​បញ្ជាក់​ផង​ដែរ​ កាល​ពី​វេលា​ម៉ោង១៧និង៣៥នាទី​ នាថ្ងៃទី១០ ខែមករា ឆ្នាំ២០២៥ មាន​ករណី​គ្រោះថ្នាក់ចរាចរណ៍​មួយ​កើត​ឡើង នៅចំណុចលើផ្លូវ៦០ម៉ែត្រ ប្រសព្វ​ផ្លូវ​បេតុង ភូមិស្រុកចេក សង្កាត់ជើងឯក ខណ្ឌដង្កោ រាជធានីភ្នំពេញ បង្កឡើង ដោយ​ឈ្មោះ សុខ សម្បត្តិ ភេទប្រុស អាយុ៤៤ឆ្នាំ ដែល​បាន​បើកបរ​រថយន្ត​មួយ​គ្រឿង​ម៉ាក TOYOTA TACOMA ពណ៌ទឹកប្រាក់ ផ្លាក​លេខ ភ្នំពេញ 2BS-1023 ក្នុង​ល្បឿន​លឿន​ខ្វះ​ការ​ប្រុងប្រយ័ត្ន និង​ស្ថិត​ក្នុង​ស្ថានភាពស្រវឹង មានកម្រិត​ជាតិ​អាល់កុល០.៤៦ Mg/L និង​បាន​រេ​ចង្កូត​មក​ឆ្វេង​ចូល​ចំណែក​ផ្លូវនៃយានម្ខាងទៀត ទៅបុកនឹងម៉ូតូ មួយគ្រឿងម៉ាក HONDA CLICK ពណ៌ខៀវ ផ្លាកលេខ ភ្នំពេញ 1II-2330 ដែល​បើកបរក្នុងទិសដៅបញ្ច្រាសគ្នា បណ្តាល​ឱ្យ​អ្នកបើកបរម៉ូតូឈ្មោះ ហេង រតនា ភេទប្រុស អាយុ២៩ឆ្នាំ និងកូនចំនួន២នាក់ ដែល​ជា​អ្នក​រួម​ដំណើរ ស្លាប់បាត់បង់ជីវិតនៅនឹងកន្លែងកើតហេតុ។ ចំណែកអ្នករួមដំណើរម្នាក់ទៀត ឈ្មោះ នន ចន្ទលក្ខណា ភេទស្រី អាយុ២៤ឆ្នាំ ដែលត្រូវជាប្រពន្ធ រងរបួសធ្ងន់៕

អត្ថបទ ៖ សុភា