ចរាចរណ៍

រថយន្តកូរ៉េ បើកលឿនដល់ស្តុបជ្រុលបុកកង់បីក្រឡាប់ រួចបន្តបុករថយន្តព្រូស

បានផុស

១ ខែ មុន

នៅ

ថ្ងៃពុធ ១៥ មករា ២០២៥

ដោយ

រថយន្តកូរ៉េ ១ គ្រឿង បើកបរលឿនខ្វះការប្រុងប្រយ័ត្ន ខណៈមកដល់ស្តុប ជ្រុលបុកម៉ូតូកង់បីឥណ្ឌាដែលកំពុងឈប់ស្តុបពីក្រោយ បណ្តាលឲ្យក្រឡាប់ មិនទាន់អស់ល្បឿន ក៏បន្តបុករថយន្តតូយ៉ូតាព្រូស កំពុងបើកឆ្លងស្តុប រងការខូចខាតយ៉ាងធ្ងន់ធ្ងរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង ១១ និង ៣០ នាទី តាមបណ្ដោយផ្លូវ ៥៩៨ កែងស្តុបការាស់សាំងតេលា ស្ថិតក្នុងសង្កាត់ទួលសង្កែទី ១ ខណ្ឌឫស្សីកែវ រាជធានីភ្នំពេញ។

ប្រភពពីកន្លែងកើតហេតុបាននិយាយថា គេបានឃើញម៉ូតូកង់បីឥណ្ឌា ១ គ្រឿង ពណ៌ស ពាក់ស្លាកលេខ ព្រៃវែង 1P-1918 កំពុងឈប់រង់ចាំស្តុប ហើយភ្លើងសញ្ញាពណ៌បៃតង រថយន្តយ៉ូតាព្រូស ពណ៌ប្រផេះ ពាក់ស្លាកលេខភ្នំពេញ 2BZ-9937 បានបើកឆ្លងស្តុប ខណៈនោះក៏ស្រាប់តែឃើញរថយន្ត ម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ 3D-8187 ដឹកសុទ្ធតែកង្កែប ដែលបើកបរតាមបណ្ដោយផ្លូវ ៥៩៨ ទិសដៅពីលិចទៅកើត លឿនមិនមើលស្តុបក្រហម ក៏ជ្រុលបុកម៉ូតូកង់បីឥណ្ឌាកំពុងឈប់ស្តុប បណ្តាលឲ្យក្រឡាប់ខ្ទាតទៅផ្លូវម្ខាង ហើយរថយន្តបង្កជ្រុលទៅបុករថយន្តព្រូស កំពុងបើកឆ្លងស្តុបរងការខូចខាតយ៉ាងធ្ងន់ធ្ងរ។

ប្រភពព័ត៌មានពីកន្លែងកើតហេតុបានបន្តទៀតថា ខណៈគ្រោះថ្នាក់ភ្លាមៗ រថយន្តបង្កមិនព្រមឈប់ទេ ទើបរថយន្តរងគ្រោះម៉ាកព្រូសបើកដេញស្ទាក់ឃាត់រថយន្តបង្កបានភ្លាមៗ។

ក្រោយពេលកើតហេតុសមត្ថកិច្ចនគរបាលជំនាញចរាចរណ៍ខណ្ឌឫស្សីកែវ បានទាក់ទងទៅសមត្ថកិច្ច នៃការិយាល័យចរាចរណ៍ផ្លូវគោករាជធានី ដើម្បីធ្វើការវាស់វែង និងយករថយន្តចំនួន ២ គ្រឿង ព្រមទាំងម៉ូតូកង់បីឥណ្ឌាទៅរក្សាទុក រង់ចាំការដោះស្រាយថ្ងៃក្រោយ៕

អត្ថបទ ៖ សំណាង