ចរាចរណ៍

បុរសម្នាក់ ស្លាប់នៅក្រោមកង់រថយន្តយ៉ាងអាណោចអាធ័ម ខណៈជិះម៉ូតូឈប់រង់ចាំភ្លើងស្តុប

បានផុស

៣ ខែ មុន

នៅ

ថ្ងៃសុក្រ ១៧ មករា ២០២៥

ដោយ

បុរសម្នាក់ បានស្លាប់នៅក្រោមកង់រថយន្តយ៉ាងអាណោចអាធ័ម ខណៈឈប់រង់ចាំភ្លើងស្តុប ត្រូវរថយន្តក្រឡុកស៊ីម៉ងត៍បើកមកពីក្រោយ បួងចង្កូតបត់បុកពីក្រោយម៉ូតូជនរងគ្រោះ រួចកិនពីលើ អូសទៅមុខជាច្រើនម៉ែត្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង ៩ និង ៣០ នាទីយប់ ថ្ងៃទី ១៦ ខែមករា ឆ្នាំ ២០២៥ ស្ថិតនៅចំណុចស្តុប ៩២ កែងផ្លូវភ្នំពេញហាណូយ សង្កាត់ឃ្មួញ ខណ្ឌសែនសុខ រាជធានីភ្នំពេញ។

តាមប្រភពព័ត៌មានពីអ្នកធ្វើដំណើរស្របគ្នាកន្លែងកើតហេតុ បានឲ្យដឹងថា នៅមុនពេលកើតហេតុ គេឃើញបុរសរងគ្រោះជិះម៉ូតូ ១ គ្រឿង ម៉ាកហុងដាឌ្រីម ស៊េរី ២០១៩ ពណ៌ខ្មៅ ពាក់ស្លាកលេខ កំពង់ចាម 1V-5865 ធ្វើដំណើរតាមបណ្ដោយផ្លូវលេខ ៩២ ទិសដៅពីកើតមកលិច ខណៈពេលជិះមកដល់ចំណុចកើតហេតុខាងលើ ក៏បានឈប់រង់ចាំភ្លើងស្តុបក្រហម។

ប្រភពបន្តថា បន្ទាប់មកគេឃើញមានរថយន្តបង្កប្រភេទក្រឡុកស៊ីម៉ងត៍ ១ គ្រឿង ពណ៌លឿងលាយស ពាក់ស្លាកលេខ ភ្នំពេញ 5A-1409 បើកបរដោយបុរសម្នាក់ ធ្វើដំណើរតាមបណ្ដោយផ្លូវលេខ ៩២ ស្របទិសគ្នា ពីកើតមកលិច ខណៈពេលបើកមកដល់ចំណុចកើតហេតុ ក៏បានឈប់រង់ចាំភ្លើងស្តុបក្រហមដូចគ្នា។ បន្ទាប់មក ភ្លើងស្តុប ក៏បានលោតពណ៌ខៀវ ស្រាប់តែរថយន្តក្រឡុកស៊ីម៉ងត៍ បានបួងចង្កូតបត់ឆ្វេងឆ្ពោះទៅតាមផ្លូវភ្នំពេញហាណូយ ដោយមិនបានមើលមុខ ស្រាប់តែបុកពីក្រោយម៉ូតូជនរងគ្រោះ រួចកិនពីលើ អូសទៅមុខជាច្រើនម៉ែត្រ បណ្ដាលឲ្យបុរសជាម្ចាស់ម៉ូតូស្លាប់នៅក្រោមកង់រថយន្ត។ ភ្លាមៗ នោះដែរ តៃកុងបម្រុងបើកទ្វាររត់គេចខ្លួន ក៏ត្រូវប្រជាពលរដ្ឋឃាត់បានប្រគល់ឲ្យសមត្ថកិច្ចយកទៅប៉ុស្តិ៍នគរបាលសង្កាត់ក្រាំងធ្នង់សួរនាំបន្ត។

ក្រោយកើតហេតុសមត្ថកិច្ចមូលដ្ឋានសហការជាមួយនឹងជំនាញចរាចរណ៍ចុះមកដល់ធ្វើការវាស់វែងយកម៉ូតូ និងរថយន្តបង្ក ទៅរក្សាទុកនៅការិយាល័យចរាចរណ៍ជំនាញផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំការដោះស្រាយនៅពេលក្រោយ។ ចំណែកសពជនរងគ្រោះ សមត្ថកិច្ចធ្វើកំណត់ហេតុប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕

អត្ថបទ ៖ សំណាង