ចរាចរណ៍

រថយន្ត ១ គ្រឿង រេចង្កូតឡើងសួនចែកទ្រូងផ្លូវបុកស្លាកប៉ាណូ បង្កគ្រោះថ្នាក់ដល់រថយន្ត ១ គ្រឿងទៀត រងរបួសធ្ងន់-ស្រាល ៣ នាក់

បានផុស

២ ខែ មុន

នៅ

ថ្ងៃសុក្រ ៧ កុម្ភៈ ២០២៥

ដោយ

រថយន្តកូរ៉េ ១ គ្រឿង សង្ស័យបើកលឿនខ្វះការប្រុងប្រយ័ត្ន រេចង្កូតឡើងលើសួនពុះចែកទ្រូងផ្លូវ ជ្រុលបុកបង្គោលស្លាកប៉ាណូបាក់រលំគងទៅលើផ្លូវម្ខាងទៀត ខណៈនោះក៏មានរថយន្តដឹកទំនិញធុនធំ ១ គ្រឿងទៀត បើកមកកិនស្លាកប៉ាណូបន្ថែម បណ្ដាលឱ្យរថយន្តឡើងរំលងសួនផ្លូវទៅបុកបង្គោលភ្លើង ២ ដើម រួចបន្តបុកចូលផ្ទះប្រជាពលរដ្ឋរងការខូចខាត និងមនុស្សក្នុងរថយន្តរងរបួសធ្ងន់-ស្រាលចំនួន ៣ នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង ១ និង ៣០ នាទី រំលងអធ្រាត្រ ឈានចូលថ្ងៃទី ៧ ខែកុម្ភៈ ឆ្នាំ ២០២៥ ចំណុចផ្លូវជាតិលេខ ៥ ស្ថិតក្នុងសង្កាត់សំរោង ខណ្ឌព្រែកព្នៅ រាជធានីភ្នំពេញ។

ប្រភពពីកន្លែងកើតហេតុបានឱ្យដឹងថា នៅមុនពេលកើតហេតុគេឃើញរថយន្តកូរ៉េ ១ គ្រឿង ពណ៌ខៀវ ពាក់ស្លាកលេខ ភ្នំពេញ 2BV-3072 បើកបរដោយបុរសម្នាក់ រួមដំណើរជាមួយបុរសម្នាក់ទៀត ធ្វើដំណើរតាមបណ្ដោយផ្លូវជាតិលេខ ៥ ទិសដៅពីជើងមកត្បូង ក្នុងល្បឿនលឿន។ លុះពេលបើកមកដល់ចំណុចកើតហេតុ ក៏រេចង្កូតមកខាងឆ្វេងដៃឡើងសួនផ្លូវបុកបង្គោលស្លាកប៉ាណូបាក់រលំ ១ ដើម ទៅលើផ្លូវម្ខាងទៀត។ ស្របគ្នានោះដែរ គេឃើញមានរថយន្តយីឌុបដឹកទំនិញធុនធំ ១ គ្រឿង ពណ៌ស ពាក់ស្លាកលេខ ភ្នំពេញ 4A-3912 បើកបរដោយបុរសម្នាក់ ធ្វើដំណើរតាមបណ្ដោយផ្លូវជាតិលេខ ៥ ទិសដៅពីត្បូងទៅជើង ក្នុងល្បឿនលឿន ជ្រុលទៅបុកកិនស្លាកប៉ាណូហោះរំលងសួនច្បារពុះចែកទ្រូងផ្លូវទៅផ្លូវម្ខាង និងជ្រុលបុកបង្គោលភ្លើងបាក់ចំនួន ២ ដើម រួចបន្តបុករះរបងដែក និងបុកចូលផ្ទះប្រជាពលរដ្ឋរងការខូចខាត។

ប្រភពដដែលបានបន្តថា ភ្លាមៗ នោះដែរ ប្រជាពលរដ្ឋក្បែរខាងក៏បាននាំគ្នាមកជួយគាស់តៃកុងយកចេញពីរថយន្ត ហើយនាំគ្នាទាក់ទងទៅរថយន្តសាមុយឱ្យមកដឹកជនរងគ្រោះចំនួន ៣ នាក់ ទៅសង្គ្រោះនៅឯមន្ទីរពេទ្យផងដែរ។

ក្រោយពេលកើតហេតុ កម្លាំងសមត្ថកិច្ចនគរបាលប៉ុស្តិ៍ បានទាក់ទងទៅសមត្ថកិច្ចនគរបាលចរាចរណ៍ខណ្ឌព្រែកព្នៅ និងជំនាញ នៃការិយាល័យចរាចរណ៍ផ្លូវគោករាជធានី ដើម្បីធ្វើការវាស់វែង និងស្ទូចរថយន្តទាំង ២ គ្រឿង យកទៅរក្សាទុករង់ចាំការដោះស្រាយថ្ងៃក្រោយ៕

អត្ថបទ ៖ សំណាង