នគរបាលស្រុកបូទុមសាគរ កំពុងស្វែងរកជនបង្ក គ្រោះថ្នាក់ចរាចរណ៍បណ្ដាលឲ្យស្លាប់មនុស្ស២ម្នាក់ និងរបួស២នាក់

កម្លាំងជំនាញនៃអធិការដ្ឋាននគរបាលស្រុកបូទុមសាគរ ខេត្តកោះកុង បាននិងកំពុងស្វែងរកអត្តសញ្ញាណជនបង្ក ករណីគ្រោះថ្នាក់ចរាចរណ៍បណ្តាលឱ្យមនុស្សស្លាប់២នាក់ និងរបួស២នាក់ លើកំណាត់ផ្លូវជាតិលេខ៤៨។

លោកវរសេនីយ៍ឯក យេន ទូច អធិការនគរបាលស្រុកបូទូមសាគរ បានឱ្យដឹងនៅថ្ងៃទី២០ ខែកុម្ភៈ ឆ្នាំ២០២៥នេះថា កម្លាំងនគរបាលជំនាញរបស់លោកកំពុងស្វែងរកកំណត់អត្តសញ្ញាណជនបង្កដែលបើកបររថយន្តម៉ាកហ៊ីហាន់ដាយ ពណ៌ស ពាក់ស្លាកលេខ ភ្នំពេញ 3D7777 អំឡុងពេលធ្វើដំណើរពីលិចទៅកើតបុកនឹងរថយន្ដ ម៉ាកស៊ីណា ពណ៌ប្រផេះ ពាក់ស្លាកលេខ2Q1704 ពេញទំហឹង។

លោកអធិការនគរបាលស្រុកបូទុមសាគរបន្តថា បច្ចុប្បន្នជនបង្កកំពុងរត់គេចខ្លួន ក្រោយបង្កហេតុកាលពីថ្ងៃទី១៩ ខែកុម្ភ: ឆ្នាំ២០២៥ វេលាម៉ោង១៦និង៤៥នាទី បណ្ដាលឱ្យស្លាប់មនុស្សស្លាប់ពីរនាក់ និងរងរបួសពីរនាក់ ត្រង់ចំណុចចន្លោះ​Km៤៥-៤៦ ផ្លូវជាតិលេខ៤៨ ស្ថិតក្នុងភូមិប្រលាន ឃុំកណ្ដោល ស្រុកបូទុមសាគរ។

បច្ចុប្បន្ន កម្លាំងនគរបាលចរាចរណ៍ បានយកវត្ថុតាងទៅរក្សាទុកអធិការដ្ឋាននគរបាលស្រុកបូទុមសាគរ ដើម្បីអនុវត្តនីតិវិធីបន្ត រីឯជនរងគ្រោះកំពុងសម្រាកព្យាបាលជំងឺនៅមន្ទីរពេទ្យ៕

អត្តបទ៖ សិរីវឌ្ឍនៈ