ចរាចរណ៍

បើករថយន្តលឿន ជ្រុលទៅបុករង្វង់មូលវិមានឯករាជ្យ រងការខូចខាត

បានផុស

២៧ វិនាទី មុន

នៅ

ថ្ងៃពុធ ២៦ កុម្ភៈ ២០២៥

ដោយ

អ៊ិន ពិសី

ស្ត្រីម្នាក់ បើករថយន្តបុករង្វង់មូលវិមានឯករាជ្យ បណ្ដាលឲ្យរងការខូចខាត និងរថយន្តខ្ទេចមួយកំណាត់មុខ បន្តទៅលែងរួច។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបានកើតឡើងកាលពីវេលាម៉ោង ១ និង ៥០ នាទី រំលងអធ្រាត្រ ឈានចូលថ្ងៃទី ២៦ ខែកុម្ភៈ ឆ្នាំ ២០២៥ នៅចំណុចរង្វង់មូលវិមានឯករាជ្យ សង្កាត់ចតុមុខ ខណ្ឌដូនពេញ រាជធានីភ្នំពេញ។

តាមប្រភពពីយុវជនម្នាក់ដែលឃើញហេតុការណ៍បានឲ្យដឹងថា មុនពេលកើតហេតុ គាត់បានឃើញ រថយន្តម៉ាក FORD RANGER WILD TRACK ពណ៌ប្រផេះ ពាក់ស្លាកលេខ ភ្នំពេញ 2BS-4833 បើកបរដោយស្ត្រីម្នាក់ ធ្វើដំណើរតាមបណ្ដោយវិថីព្រះស៊ីសុវត្ថិ ទិសដៅពីជើងទៅត្បូង ក្នុងល្បឿនលឿន ខណៈបើកមកដល់ចំណុចទល់មុខហាងកាហ្វេអាម៉ាហ្សូន រថយន្តបានប៉ះកៀរម៉ូតូ ២ គ្រឿង បណ្ដាលឲ្យដួល រួចមិនព្រមឈប់ដោះស្រាយ ក៏បន្តបើកចេញពីទីតាំងកើតហេតុ។ ភ្លាមៗ នោះ ភាគីខាងម៉ូតូ ក៏នាំគ្នាដេញតាមរថយន្តរហូតដល់មហាវិថីព្រះនរោត្តម។ រថយន្តបើកគេចរហូត ជ្រុលទៅបុករង្វង់មូលវិមានឯករាជ្យ បង្កការខូចខាត តែមិនទាន់អស់ល្បឿន ក៏បើកទៅដល់ក្បែររបងវិទ្យាស្ថានជាតិអប់រំ ទើបអស់ល្បឿនមិនអាចបន្តដំណើរទៅមុខទៀតបាន។ ចំណែកអ្នកបើករថយន្តបង្កបានឡើងរថយន្តព្រុស ០១ គ្រឿងទៀត បើកចេញពីទីតាំងកើតហេតុ ដើម្បីទៅព្យាបាលរបួសនៅឯមន្ទីរពេទ្យ។

ក្រោយកើតហេតុសមត្ថកិច្ចមូលដ្ឋានបានទាក់ទងហៅជំនាញចរាចរណ៍ ដើម្បីចុះមកធ្វើការវាស់វែង និងយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយពេលក្រោយ៕

អត្ថបទ ៖ រដ្ឋា