បុរសម្នាក់ ស្លាប់ភ្លាមៗ ខណៈជិះម៉ូតូឆ្លងផ្លូវត្រូវរថយន្ត ១ គ្រឿង បុកពេញទំហឹង

បុរស​ម្នាក់ ស្លាប់​ភ្លាមៗ នៅ​នឹង​កន្លែង​កើត​ហេតុ ខណៈ​ជិះ​ម៉ូតូ​ឆ្លង​ផ្លូវ ត្រូវ​រថយន្ត ១ គ្រឿង បុក​ពេញ​ទំហឹង។

ហេតុការណ៍​នេះ​បាន​កើត​ឡើង​កាលពី​វេលា​ម៉ោង ១ និង ៣០ នាទី​រសៀល ថ្ងៃ​ទី ៣ ខែ​មីនា ឆ្នាំ ២០២៥ ស្ថិត​នៅ​តាម​បណ្ដោយ​ផ្លូវ​បុរី​អង្គរ សង្កាត់​ច្រាំង​ចំរេះ​ទី ១ ខណ្ឌ​ឫស្សី​កែវ រាជធានី​ភ្នំពេញ។

តាម​ប្រភព​ពី​កន្លែង​កើតហេតុ​បាន​ឲ្យ​ដឹង​ថា មុន​ពេល​កើតហេតុ​គេ​បាន​ឃើញ​នារី​វ័យ​ក្មេង​ម្នាក់ បើក​រថយន្ត ១ គ្រឿង ម៉ាក Toyata Pruis ពណ៌​ស ពាក់​ស្លាក​លេខ ភ្នំពេញ 2CA-1626 ក្នុង​ល្បឿន​លឿន ទិសដៅ​ពី​ត្បូង​ទៅ​ជើង​បញ្ច្រាស​គ្នា ជាមួយ​ម៉ូតូ ១ គ្រឿង ម៉ាក Honda Dream ពណ៌​ខ្មៅ ពាក់​ស្លាក​លេខ ភ្នំពេញ 1 CG- 5202 ខណៈ​មក​ដល់​ចំណុច​កើតហេតុ​ជា​កន្លែង​ទ្រូងផ្លូវ​ដាច់ បុរស​រង​គ្រោះ បាន​បើក​ម៉ូតូ​ឆ្លង​ផ្លូវ​មិន​ប្រយ័ត្ន បណ្ដាល​ឲ្យ​រថយន្ត​បុក​ពេញទំហឹង​ស្លាប់​ភ្លាមៗ នៅ​នឹង​កន្លែង។

ក្រោយ​កើត​ហេតុ កម្លាំង​សមត្ថកិច្ច​ជំនាញ​មូលដ្ឋាន បាន​ចុះ​មក​ដល់​ទីតាំង​កើតហេតុ និង​ធ្វើ​ការ​ឃាត់ខ្លួន​អ្នក​បើកបរ​រថយន្ត​ខាង​លើ​យក​ទៅ​កាន់​ប៉ុស្តិ៍​នគរបាល​រដ្ឋបាល​ច្រាំង​ចំរេះ​ទី ១ ដើម្បី​អនុវត្ត​នីតិវិធី​ច្បាប់​ផង​ដែរ៕

អត្ថបទ ៖ ម៉េង