ចរាចរណ៍

BMW បុក Chevrolet ពីក្រោយវិលមួយជុំ រុញផ្ទប់រនាំងដែក ០៦ ផ្ទាំង លើផ្លូវ ៦០ ម៉ែត្រ ដែលអាជ្ញាធរទើបតែដាក់ថ្មីៗ នេះ រងការខូចខាត

បានផុស

២ សប្តាហ៍ មុន

នៅ

ថ្ងៃសៅរ៍ ១៥ មីនា ២០២៥

ដោយ

បុរសជាម្ចាស់រថយន្ត BMW បើកបុករថយន្ត Chevrolet ពីក្រោយពេញទំហឹង បណ្ដាលឲ្យរុញទៅបុករះរនាំងដែកពុះចែកទ្រូងផ្លូវ ចំនួន ០៦ ផ្ទាំង លើបណ្ដោយផ្លូវ ៦០ ម៉ែត្រ ដែលអាជ្ញាធរទើបតែដាក់កាលពីថ្មីៗ នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបានកើតឡើងកាលពីវេលាម៉ោង ១០ និង ២០ នាទីយប់ ថ្ងៃទី ១៤ ខែមីនា ឆ្នាំ ២០២៥ ស្ថិតតាមបណ្ដោយផ្លូវ ៦០ ម៉ែត្រ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។

តាមប្រភពព័ត៌មានពីប្រជាពលរដ្ឋបានឲ្យដឹងថា គាត់ឃើញបុរសម្នាក់ បើករថយន្តស៊េរីទំនើប ម៉ាក BMW ពណ៌ខ្មៅ ពាក់ស្លាកលេខ កម្ពុជា 1996.L.K ក្នុងល្បឿនលឿន ខណៈមកដល់ចំណុចកើតហេតុ ជិតដល់ស្តុបស័រដែស លើបណ្ដោយផ្លូវ ៦០ ម៉ែត្រ ស្រាប់តែទៅបុកពីក្រោយរថយន្ត Chevrolet ពណ៌កណ្ដុរប្រមេះ ពាក់ស្លាកលេខ ភ្នំពេញ 2BZ-1508 ដែលកំពុងបើកទិសដៅស្របគ្នា បណ្ដាលឲ្យរថយន្ត Chevrolet ទៅបុករនាំងដែកពុះចែកផ្លូវ វិលមួយជុំ ទៅប៉ះរនាំងដែកបាក់ ចំនួន ០៦ ផ្ទាំង បង្កការខូចខាតរថយន្តស្ទើរទាំងស្រុង ប៉ុន្តែសំណាងល្អមិនបង្កឲ្យមនុស្សណាម្នាក់រងរបួសនោះឡើយ។

ប្រភពដដែលបានបញ្ជាក់បន្ថែមថា កាលពីថ្មីៗ កន្លងទៅនេះ គាត់ទើបតែឃើញអាជ្ញាធរយករនាំងដែកនេះមកដាក់ ដើម្បីកាត់បន្ថយគ្រោះថ្នាក់ចរាចរណ៍ ប៉ុន្តែទើបតែមួយករណីនេះទេ បុករនាំងដែកពុះចែកផ្លូវចំនួន ០៦ ផ្ទាំង មុនគេតែម្ដង។

ក្រោយពេលកើតហេតុ សមត្ថកិច្ចជំនាញចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ចុះមកធ្វើការវាស់វែងយករថយន្តទាំង ០២ គ្រឿង ទៅរក្សាទុក រង់ចាំដោះស្រាយគ្នាពេល ក្រោយ៕

អត្ថបទ ៖ រដ្ឋា