ចរាចរណ៍

បុរសម្នាក់ កំពុងជិះកង់សុខៗ ត្រូវរថយន្តដឹកអ្នកដំណើរក្រុមហ៊ុនឬទិ្ឋមុនីបុកស្លាប់

បានផុស

១ ម៉ោង មុន

នៅ

ថ្ងៃអង្គារ ១ មេសា ២០២៥

ដោយ

បុរសម្នាក់ កំពុងជិះកង់សុខៗ ស្រាប់តែត្រូវរថយន្តដឹកអ្នកដំណើរក្រុមហ៊ុនឬទិ្ឋមុនីបុកស្លាប់ ខណៈពេលបញ្ជូនដល់មន្ទីរពេទ្យកាល់ម៉ែត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបានកើតឡើងកាលពីវេលាម៉ោង ៥ ព្រឹក ថ្ងៃទី ១ ខែមេសា ឆ្នាំ ២០២៥ ស្ថិតនៅលើកំណាត់ផ្លូវជាតិលេខ ៦ សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ។

តាមប្រភពព័ត៌មានពីកន្លែងកើតហេតុបានឲ្យដឹងថា គេបានឃើញបុរសរងគ្រោះជិះកង់ពាក់មួកការពារសុវត្ថិភាព ធ្វើដំណើរឆ្លងកាត់ផ្លូវជាតិលេខ ៦ ទិសដៅពីត្បូងទៅជើង លុះមកដល់ចំណុចកើតហេតុ ក៏ស្រាប់តែមានរថយន្តដឹកអ្នកដំណើរ ១ គ្រឿងរេចង្កូតមកបុកពីក្រោយ បណ្ដាលឲ្យរងរបួសធ្ងន់។

អ្នកឃើញហេតុការណ៍បានបន្តថា បន្ទាប់ពីបុករួច រថយន្តក្រុមហ៊ុនឬទិ្ឋមុនីដឹកអ្នកដំណើរពេលយប់ បានបើកពីកន្លែងកើតហេតុមកឈប់ រួចចុះពីលើរថយន្តគេចខ្លួនបាត់ បន្សល់តែភ្ញៀវដែលកំពុងគេងលើរថយន្តប៉ុណ្ណោះ។ ក្នុងនោះពេលភ្ញៀវចុះពីលើរថយន្តមកទើបដឹងថាអ្នកបើករថយន្តបានបុកបុរសម្នាក់ជិះកង់តាមផ្លូវ បណ្ដាលឲ្យរងរបួសធ្ងន់ រួចអ្នកបើករថយន្តបានគេចខ្លួនបាត់។

ប្រភពបន្តទៀតថា ពេលនោះដែរ ក៏មានកូនស្រីរបស់គាត់(ជនរងគ្រោះ) បានដឹកជនរងគ្រោះតាមកង់បីយកទៅសង្គ្រោះនៅមន្ទីរពេទ្យកាល់ម៉ែត។ ក្នុងនោះដែរ ពេលដឹកទៅដល់មន្ទីរពេទ្យ គ្រូពេទ្យបានប្រាប់ថាជនរងគ្រោះបានស្លាប់បាត់ហើយ។

ក្រោយពេលកើតហេតុ សមត្ថកិច្ចមូលដ្ឋាន បានមកដល់ និងទាក់ទងទៅជំនាញចរាចរណ៍ក្រុងឲ្យចុះមកវាស់វែងយកកង់ និងរថយន្តក្រុង ទៅរក្សាទុក រង់ចាំអនុវត្តតាមនីតិវិធីច្បាប់៕

អត្ថបទ ៖ សំណាង