មេទ័ពកំពូលៗត្រូវបណ្តេញចេញឬផ្អាកការងារនៅបន្ទាយ Fort Hood បន្ទាប់ពីការស៊ើបអង្កេតលើករណី Guillen

កាលពីថ្ងៃអង្គារ កងទ័ពសហរដ្ឋអាមេរិកបានបង្ហាញថា ខ្លួនបានបណ្តេញឬផ្អាកមន្រ្តីចំនួន១៤នាក់ដែលឈរជើងនៅឯមូលដ្ឋាន Fort Hood ដោយក្នុងនោះរួមមានទាំងមេបញ្ជាការកំពូល៥នាក់ផងដែរបន្ទាប់ពីក្រុមស៊ើបអង្កេតមួយបានប្រកាសថា ពួកគេបានរួមចំណែកក្នុងការបង្កអំពើហិង្សា ការរំលោភផ្លូវភេទនិងការយាយីផ្លូវភេទនៅឯមូលដ្ឋាននេះ។

ការរកឃើញនេះបានកើតឡើងក្នុងពេលមួយឆ្នាំដែលទាហានយ៉ាងតិច២៥នាក់ដែលត្រូវបានចាត់ឲ្យទៅបន្ទាយ Fort Hood បានស្លាប់ដោយសារការធ្វើអត្តឃាត គ្រោះថ្នាក់ឬអំពើមនុស្សឃាត។ អ្វីដែលលេចធ្លោជាងគេក្នុងចំណោមអំពើទាំងនេះគឺការយាយីផ្លូវភេទនិងឃាតកម្មលើពលទោថ្នាក់ទី១នាង Vanessa Guillen។

ប៉ុន្មានខែមុនពេលនាងបាត់ខ្លួននៅខែមេសា ពលទោអាយុ២០ឆ្នាំក្នុងកងវរសេនាធំទ័ពសេះទី៣រូបនេះបានប្រាប់សាច់ញាតិថា នាងកំពុងត្រូវបានយាយីដោយទាហានម្នាក់ទៀតនៅឯបន្ទាយ Fort Hood។

សាកសពរបស់ Guillen​ មិនត្រូវបានរកឃើញទេរហូតដល់ថ្ងៃទី៣០ខែមិថុនាហើយឃាតករដែលគេសង្ស័យបានស្លាប់ដោយសារការធ្វើអត្តឃាតខណៈដែលអាជ្ញាធរកំពុងតាមចាប់ខ្លួនគាត់។

នៅដើមខែនោះ អាជ្ញាធរបានរកឃើញសាកសពទាហានបាត់ខ្លួនម្នាក់ទៀតឈ្មោះ Gregory Morales។

លេខាធិការកងទ័ពលោក Ryan McCarthy បាននិយាយកាលពីថ្ងៃអង្គារថា នឹងមានការស៊ើបអង្កេតមួយទៀតលើបុគ្គលិកនិងនីតិវិធីនៅអង្គភាពបញ្ជាការស៊ើបអង្កេតព្រហ្មទណ្ឌរបស់មូលដ្ឋាននេះ។

លោក McCarthy បានសម្តែងការខកចិត្តចំពោះថ្នាក់លើនៅមូលដ្ឋាន Fort Hood ហើយបានប្តេជ្ញាថានឹងចាត់វិធានការចំពោះការបំពេញកិច្ចការមិនបានល្អរបស់ពួកគេ។

ចុងក្រោយ លោក McCarthy បានប្រកាសគោលនយោបាយកងទ័ពថ្មីដែលផ្តល់គោលការណ៍ណែនាំពីរបៀបដែលមេបញ្ជាការនានាគួរដោះស្រាយជាមួយទាហានដែលបាត់ខ្លួន។

ករណីរបស់ Guillen ប្រហែលជាបង្កឲ្យមានការផ្សព្វផ្សាយខ្លាំងក្លាបំផុតប៉ុន្តែរឿងរ៉ាវផ្សេងទៀតដែលទាក់ទងនឹងមូលដ្ឋាននេះក៏បានបង្កឲ្យមានការចាប់អារម្មណ៍ទូទាំងប្រទេសផងដែរ៕

ប្រែសម្រួលដោយ៖ Vann Vann

ប្រភព៖ ABC News

ចុចអាន៖ ស្អែកនេះ សហរដ្ឋអាមេរិកចាប់ផ្តើមយុទ្ធនាការជាប្រវត្តិសាស្រ្តកម្ចាត់ជំងឺកូវីដ

ចុចអាន៖ អាមេរិកក៏នឹងមិនចាក់វ៉ាក់សាំងកូវីដរបស់ក្រុមហ៊ុន Pfizer ដល់ក្រុមមនុស្សប្រភេទនេះដែរ