កុមារាអាយុថ្លៃពីគ្រោះថ្នាក់ចរាចរណ៍ដ៏រន្ធត់នៅ​ស្រុកថ្មគោល បានទទួលថវិកាឧបត្ថម្ភ ១ លានរៀល

កុមារាអាយុ ២ ឆ្នាំម្នាក់ ដែលអាយុថ្លៃនៅក្នុងករណីគ្រោះថ្នាក់ចរាចរណ៍ក្នុងស្រុកថ្មគោលកាលពីពេលថ្មីៗនេះ ទទួលការឧបត្ថម្ភពីសំណាក់លោកស្នងការនូវទឹកប្រាក់ចំនួន១លានរៀល។

ដោយការអាណិតអាសូរចំពោះកុមារា យឿន វ៉ាន់ឆាយ ដែលត្រូវកំព្រាឪពុកម្ដាយ កាលពីរសៀលថ្ងៃទី ៣១ ខែ ធ្នូ ឆ្នាំ ២០២០ លោកឧត្តមសេនីយ៍ទោ សាត គឹម​សាន ស្នងការនៃស្នងការដ្ឋាននគរបាលខេត្តបា​ត់ដំបង បានឧបត្ថម្ភទឹកប្រាក់ចំនួន១លានរៀល តាមរយៈ លោកវរសេនីយ៍ឯក ចាន់ សុធី នាយការិយាល័យនគរបាលចរាចរណ៍ផ្លូវគោក យកជូនក្រុមគ្រួសារសាច់ញាតិដែលកំពុងបីបាច់ក្មេងប្រុសរូបនេះ។ 

សូមរំឭកថា កុមារា យឿន វ៉ាន់ឆាយ ត្រូវបាត់បង់ឪពុកម្ដាយក្រោយហេតុការណ៍គ្រោះថ្នាក់ចរាចរណ៍ដ៏​រន្ធត់មួយកាលពី យប់ថ្ងៃទី ២៤ ខែ ធ្នូ ឆ្នាំ ២០២០ នៅលើកំណាត់ផ្លូវជាតិលេខ៥ ស្ថិតក្នុងភូមិពពា​លខែ ឃុំអូរតាគី ស្រុកថ្មគោល ខេត្តបាត់ដំបង រវាងរថយន្ត ជាមួយនឹងរថយន្តបណ្តាលឱ្យមនុស្ស​ចំនួន ០៨ នាក់ បានស្លាប់បាត់បង់ជីវិតភ្លាមៗនៅនឹងកន្លែង ។

ក្នុងឱកាសនេះ លោកឧត្តមសេនីយ៍ទោ ស្នងការនៃស្នងការដ្ឋាននគរបាលខេត្តបាត់ដំបង​ បានអំពាវនាវចំពោះបងប្អូនអ្នកប្រើប្រាស់ផ្លូវទាំងឡាយ មេត្តាចូលរួមគោរពច្បាប់ចរាចរណ៍ឱ្យ​បានខ្ជាប់ខ្ជួនក្នុងពេលធ្វើដំណើរទៅទីជិតឬឆ្ងាយ សូមកុំទទួលទានគ្រឿងស្រវឹ​ងនៅពេលបើកបរ ដើម្បីសុវត្ថិភាពទាំងអស់គ្នា៕

អត្ថបទ៖ សោ និយមរ័ត្ន

ចុចអាន៖ ត្រឹមមួយ​ថ្ងៃ ពលករ ១២ នាក់​ភាគច្រើន​នៅ​ប៉ៃលិន បាន​ឆ្លងកូវីដ ១៩

ចុចអាន៖ ផ្អាក​ដឹកជញ្ជូន​ពលករ​ ទោះ​មាន​ដល់​រាប់ម៉ឺន​នាក់ ត្រូវ​ពង្រឹង​សមត្ថភាព​​គ្រប់គ្រង ​ចត្តាឡីស័ក​តាមព្រំដែន