ព័ត៌មានជាតិ

ពងទាកូនស្រែរនោង មួយថ្ងៃលក់បានជាង១០ម៉ឺនគ្រាប់ អាចកុម្ម៉ង់វេចខ្ចប់ផ្ញើទៅបាន

បានផុស

៤ years មុន

នៅ

ថ្ងៃព្រហស្បតិ៍ ១៤ មករា ២០២១

ដោយ

ពងទាកូនផលិត នៅក្នុងសហគមន៍ស្រែរនោង ខេត្តតាកែវ គឺនៅតែត្រូវបានគេចាត់ទុកថា ជាពងទា ដែលមានរសជាតិឆ្ងាញ់ជាងគេបង្អស់ ហើយមានទីផ្សារធំទូលំទូលាយនៅទូទាំងប្រទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពងទាកូននេះ ត្រូវបានផលិតឡើង ដោយកសិករប្រមាណជាង ៥០គ្រួសារ ដែលសុទ្ធសឹងតែជាអ្នកមានកសិដ្ឋានចិញ្ចឹមទាធ្វើអាជីវកម្មនៅឃុំស្រែរនោង ស្រុកត្រាំកក់ ខេត្តតាកែវ ដោយបានរួមគ្នាបង្កើតជាសហគមន៍ពងទាកូន ដើម្បីផ្គត់ផ្គង់នៅលើទីផ្សារ ដែលបច្ចុប្បន្នបានចងក្រងទៅជាសហគមន៍ផលិតពងទាកូនច្បាស់លាស់មួយ និងមានការយកចិត្តទុកដាក់និងប្រើប្រាស់បច្ចេកទេសចិញ្ចឹមទាយកពងថែទាំតាមលក្ខណៈធម្មជាតិសុទ្ធសាធ ចាប់តាំងពីការផ្តល់ចំណីមេទា រហូតដល់ផលិតជាពងនិងបញ្ចេញលក់នៅលើទីផ្សារ។ សម្រាប់តម្លៃបោះដុំពងទាកូនឲ្យម៉ូយធំៗ នៅទូទាំងប្រទេសគិតត្រឹមថ្ងៃទី១៣ ខែមករា ឆ្នាំ២០២១នេះ លោក សូត្រ សុផល ប្រធានសហគមន៍ពងទាកូនស្រែរនោង បានឲ្យដឹងថា ពងទាកូនមានតម្លៃ ចាប់ពី៥០០រៀល ទៅ៥៥០រៀលក្នុងមួយគ្រាប់។ ចំពោះតម្លៃលក់រាយវិញ ក្នុង១គ្រាប់ ៧០០រៀល ក្នុងនោះសហគមន៍បានផ្គត់ផ្គង់ការនាំចេញពងទាកូនក្នុងមួយថ្ងៃៗប្រមាណជា១០ម៉ឺនគ្រាប់ ពងទាប្រៃ និងពងទាសាប ប្រហែល៣ទៅ៤ម៉ឺនគ្រាប់ និងពងទា ដែលភ្ញាស់យកកូនប្រហែល៥ពាន់ក្បាល សម្រាប់ផ្គត់ផ្គង់ទីផ្សារក្នុងខេត្តក៏ដូចជានាំចេញទៅតាមបណ្តាខេត្តនានា និងរាជធានីភ្នំពេញ។

ចំណែកលោក ញ៉ិប ស្រ៊ន ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តតាកែវ បានបញ្ជាក់ឲ្យដឹងដែរថា ទានៅសហគមន៍ស្រែរនោង ផលិត១ថ្ងៃបានជាង៥០ម៉ឺនពង សម្រាប់ធ្វើជាពងទាប្រៃ ពងទាសាប ក៏ដូចជាផលិតឲ្យភ្ញាស់ចេញជាពងទាកូន ផងដែរ។ លោកប្រធានមន្ទីរបានអះអាងថា ផលិតផលពងទាពីស្រែរនោង បានផ្គត់ផ្គង់នៅទីផ្សារក្នុងខេត្ត ក៏ដូចជានាំចេញទៅតាមបណ្តាខេត្តផ្សេងៗ ដោយអ្នកទិញមិនចាំបាច់ទៅដល់កន្លែងឡើយ គ្រាន់តែបញ្ជាទិញ អ្នកលក់អាចវេចខ្ចប់ផ្ញើទៅបាន៕

អត្ថបទ៖ វីរៈ

សូមចុចអាន៖ ម្ហូបប្រចាំត្រកូលខេត្តតាកែវមួយទៀត ល្បីមិនចាញ់បង្កងទឹកសាប រហូតខេត្តចង់សង់រូបសំណាកឲ្យថែមទៀត