ចំនួនអ្នកស្លាប់ដោយសារព្យុះទីហ្វុង Vamco នៅប្រទេសហ្វីលីពីន កើនឡើងដល់ ៦៧ នាក់

ទីភ្នាក់ងារគ្រប់គ្រងគ្រោះមហន្តរាយជាតិបាននិយាយនៅថ្ងៃអាទិត្យនេះថា ចំនួនអ្នកស្លាប់ដោយសារព្យុះទីហ្វុង Vamco ដែលបានវាយប្រហារប្រទេសហ្វីលីពីនបានកើនឡើងដល់ ៦៧ នាក់ ខណៈមនុស្ស ១២ នាក់នៅតែបាត់ខ្លួននៅឡើយ ។ ចំណែកមនុស្ស ២២ នាក់បានរងរបួស ។

ប្រធានាធិបតី Rodrigo Duterte គ្រោងនឹងហោះហើរទៅកាន់ខេត្ត Tuguegarao ភាគខាងជើងដើម្បីវាយតម្លៃស្ថានភាពនៅតំបន់ជ្រលងភ្នំ Cagayan ដែលត្រូវបានជន់លិចយ៉ាងខ្លាំង បន្ទាប់ពីព្យុះទីហ្វុង Vamco បានធ្វើឲ្យមានភ្លៀងធ្លាក់នៅកោះ Luzon ក្នុងនោះមានទាំងទីក្រុងម៉ានីល ផងដែរ ។

អ្នកនាំពាក្យទីភ្នាក់ងារគ្រោះមហន្តរាយលោក Mark Timbal បាននិយាយថា អ្នកស្លាប់ ២២ នាក់គឺនៅក្នុងតំបន់ Cagayan, ១៧ នាក់នៅភាគខាងត្បូងកោះ Luzon, ៨ នាក់នៅតំបន់ Metro Manila និង ២០ នាក់នៅតំបន់ផ្សេងទៀត ។

លោក Timbal បាននិយាយថា ការខូចខាតចំពោះផលកសិកម្មដោយសារទឹកជំនន់ពីព្យុះ Vamco ត្រូវបានគេប៉ាន់ស្មានថា មានចំនួន ១.២ ពាន់លានប៉េសូ (២៥ លានដុល្លារ) ខណៈការខូចខាតហេដ្ឋារចនាសម្ព័ន្ធត្រូវបានប៉ាន់ប្រមាណថាមានចំនួន ៤៧០ លានប៉េសូ (ជិត ១០ លានដុល្លារ) ។ ចំណែកផ្ទះជិត ២៦,០០០ ខ្នងត្រូវបានខូចខាតផងដែរ ។

គួរបញ្ជាក់ថា ព្យុះ Vamco ជាព្យុះទីហ្វុងទី ២១ ដែលវាយប្រហារប្រទេសហ្វីលីពីននៅឆ្នាំនេះ ។ វាបានបោកបក់កាត់កោះ Luzon កាលពីល្ងាចថ្ងៃពុធ និងបង្កជាទឹកជំនន់ដ៏អាក្រក់បំផុតក្នុងរយៈពេលជាច្រើនឆ្នាំនៅក្នុងតំបន់មួយចំនួននៃរដ្ឋធានី ៕

ប្រែសម្រួលដោយ ៖ ជីវ័ន្ត

ប្រភព ៖ REUTERS

ចុចអាន ៖ ព្យុះ Vamco បោកបក់មកដល់​វៀតណាម​ហើយ ដោយមនុស្ស​ជិត ៥សែននាក់​ត្រូវ​ជម្លៀសទៅកន្លែង​មាន​សុវត្ថិភាព

ចុចអាន ៖ ព្យុះ Vamco សម្លាប់មនុស្សដល់៤២នាក់នៅ ហ្វីលីពីន ខណៈកំពុងធ្វើដំណើរទៅ វៀតណាម