ចិនទទួលបានវ៉ាក់សាំងកូវីដ ១០០ លានដូសពីក្រុមហ៊ុន BioNTech ដើម្បីបង្កើនការផ្គត់ផ្គង់ក្នុងប្រទេស

ក្រុមហ៊ុនផលិតឱសថមួយរបស់ចិនទទួលបានវ៉ាក់សាំងកូវីដ ១៩ ចំនួន ១០០ លានដូសពីក្រុមហ៊ុនអាមេរិក Pfizer និងដៃគូសហការ BioNTech របស់អាល្លឺម៉ង់ ខណៈប្រទេសនេះស្វែងរកការចាក់វ៉ាក់សាំងនៅក្រៅប្រទេសបន្ថែមលើវ៉ាក់សាំងដែលផលិតក្នុងស្រុកដើម្បីធានាការចាក់គ្រប់គ្រាន់សម្រាប់ប្រទេសដែលមានប្រជាជនច្រើនបំផុតនៅលើពិភពលោកមួយនេះ ។

ក្រុមហ៊ុនឱសថ Shanghai Fosun ដែលកាលពីខែមីនាបានចុះកិច្ចព្រមព្រៀងជាមួយក្រុមហ៊ុនអាល្លឺម៉ង់ BioNTech ដើម្បីអភិវឌ្ឍ និងដាក់លក់វ៉ាក់សាំង mRNA នៅក្នុងប្រទេសចិននឹងធ្វើការទូទាត់ប្រាក់ជាមុនចំនួន ២៥០ លានអឺរ៉ូ (៣០០ លានដុល្លារអាមេរិក) សម្រាប់វ៉ាក់សាំង ៥០ លានដូសដំបូង ខណៈក្រុមហ៊ុនផលិតវ៉ាក់សាំងអាល្លឺម៉ង់នឹងផ្គត់ផ្គង់មិនតិចជាង ១០០ លានដូសសម្រាប់ប្រទេសចិននៅឆ្នាំ ២០២១ ។

ប៉ុន្តែការផ្គត់ផ្គង់វ៉ាក់សាំងរបស់ក្រុមហ៊ុនអាល្លឺម៉ង់ BioNTech ដល់ប្រទេសចិនគឺមិនពាក់ព័ន្ធនឹងក្រុមហ៊ុនដៃគូ Pfizer ក្នុងកិច្ចព្រមព្រៀងនេះនោះទេ ។

ទន្ទឹមនោះការសាកល្បងវ៉ាក់សាំងដែលត្រូវបានបង្កើតឡើងដោយក្រុមហ៊ុនអភិវឌ្ឍន៍ក្នុងស្រុករួមមានក្រុមហ៊ុន China National Biotec Group (CNBG) និងក្រុមហ៊ុន Sinovac Biotech ក៏ជិតនឹងទទួលបានការយល់ព្រមពីនិយតករឱសថចិនផងដែរដោយរំពឹងថាវ៉ាក់សាំងចំនួន ១.៦ ពាន់លានដូសនឹងផលិតចេញនៅឆ្នាំ ២០២១ ។

គួររម្លឹកថា វ៉ាក់សាំងក្រុមហ៊ុន Pfizer-BioNTech ត្រូវបានអនុម័តឲ្យប្រើប្រាស់បន្ទាន់នៅសហរដ្ឋអាមេរិក និងអង់គ្លេស ខណៈដែលក្រុមហ៊ុន Shanghai Fosun ក៏នឹងស្វែងរកការអនុញ្ញាតពីនិយតករនៅក្នុងប្រទេសចិនដោយប្រើទិន្នន័យពីការសាកល្បងក្នុងប្រទេសដែលកំពុងដំណើរការនូវដំណាក់កាលទី ២ និងពីការធ្វើតេស្តដំណាក់កាលទី ៣ នៅក្រៅប្រទេស ៕

ប្រែសម្រួលដោយ ៖ ជីវ័ន្ត

ប្រភព ៖ Bloomberg

ចុចអាន ៖ ផ្ទុះកូវីដក្នុងអន្តេវាសិកដ្ឋានកូរ៉េខាងត្បូង ឆ្លងនិស្សិតវៀតណាម ២០ នាក់

ចុចអាន ៖ ប្រជាជនពិភពលោកមួយភាគបួននឹងមិនទទួលបានវ៉ាក់សាំងកូវីដឡើយរហូតដល់ឆ្នាំ ២០២២ ឯណោះ