គ្មានចន្លោះលើលោក កូវីដរាលដាលដល់ទ្វីបអង់តាក់ទិក ខណៈមនុស្ស ៣៦ នាក់ឆ្លងជំងឺនេះ

ទីបំផុតវីរុសកូរ៉ូណាបានរីករាលដាលទៅដល់ទ្វីបអង់តាក់ទិក ខណៈដំបូងឡើយទ្វីបមួយនេះមិនមានករណីឆ្លងជំងឺកូវីដ ១៩ នោះទេនៅទូទាំងពិភពលោក ។

យ៉ាងហោចណាស់មានមនុស្ស ៣៦ នាក់បានឆ្លងជំងឺនេះនៅឯមូលដ្ឋានស្រាវជ្រាវ Bernardo O’giggins របស់កងកម្លាំងឈីលីក្នុងនោះរួមមានបុគ្គលិកយោធា ២៦ នាក់ និងអ្នកម៉ៅការស៊ីវិលចំនួន ១០ នាក់ដែលធ្វើការនៅមូលដ្ឋាននោះ ខណៈក្រុមមន្ត្រីសុខភាព និងកងកម្លាំងកំពុងញាប់ដៃញាប់ជើងពិនិត្យ និងធ្វើចត្តាឡីស័កដល់បុគ្គលិកទាំងនោះ ។

ស្ថានីយ៍ស្រាវជ្រាវ និងយោធានៅទ្វីបអង់តាក់ទិកដែលស្ថិតក្នុងចំណោមតំបន់ដាច់ស្រយាលបំផុតក្នុងពិភពលោកបានខិតខំប្រឹងប្រែងយ៉ាងខ្លាំងក្នុងប៉ុន្មានខែថ្មីៗនេះដើម្បីការពារជំងឺនេះដោយលុបចោលការធ្វើដំណើរទេសចរណ៍ ពិនិត្យមើលសកម្មភាពចេញចូលរបស់បុគ្គលិក និងបិទទីតាំងនានាជាដើម ។

មន្ដ្រីទទួលបន្ទុកផ្នែកព័ត៌មាននៃកងទ័ពបាននិយាយថា ករណីទីដំបូងនៃជំងឺកូវីដ ១៩ ត្រូវបានគេរាយការណ៍នៅពាក់កណ្តាលខែធ្នូ នៅពេលទាហាន ២ នាក់ធ្លាក់ខ្លួនឈឺ ។

ចំណែកកងទ័ពជើងទឹករបស់ប្រទេសឈីលីបានរាយការណ៍ថា ខ្លួនក៏បានរកឃើញករណីឆ្លងជំងឺកូវីដ ១៩ ចំនួន ៣ ករណីផងដែរក្នុងចំណោមសមាជិកនាវិក ២០៨ នាក់នៃកងនាវាដែលបានចូលចតនៅតំបន់អង់តាក់ទិកចន្លោះពីថ្ងៃទី ២៧ ខែវិច្ឆិកាដល់ថ្ងៃទី ១០ ខែធ្នូ ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ អ្នកវិទ្យាសាស្រ្តព្រមានអំពីជំងឺថ្មីមួយទៀតឈ្មោះ Disease X ដែលនឹងបង្កវិនាសកម្មខ្លាំងជាងកូវីដ

ចុចអាន ៖ សិង្ហបុរី ហាមឃាត់អ្នកដំណើរមកពីចក្រភពអង់គ្លេសដោយសារជំងឺក្លាយពូជប្រភេទថ្មី