ប្រទេសអាស៊ីអាគ្នេយ៍មួយទៀតហាមឃាត់អ្នកធ្វើដំណើរមកពីអង់គ្លេស ពាក់ព័ន្ធកូវីដក្លាយពូជថ្មី

សារាចរមួយដែលចេញដោយក្រុមការងាកូវីដ ១៩ របស់ប្រទេសឥណ្ឌូនេស៊ីនៅសប្តាហ៍នេះបាននិយាយថា ឥណ្ឌូណេស៊ីបានហាមឃាត់អ្នកធ្វើដំណើរមកពីអង់គ្លេស និងរឹតបន្តឹងច្បាប់សម្រាប់អ្នកដែលធ្វើដំណើរមកពីអឺរ៉ុប និងអូស្រ្តាលីដើម្បីព្យាយាមកំណត់ការរីករាលដាលនៃវីរុសកូរ៉ូណាក្លាយពូជប្រភេទថ្មី ។

សារាចរបន្តថា ជនបរទេសដែលធ្វើដំណើរមកពីអង់គ្លេសជាប្រទេសដែលវីរុសកូរ៉ូណាក្លាយពូជប្រភេទថ្មីកំពុងរីករាលដាលយ៉ាងឆាប់រហ័សនឹងមិនត្រូវបានអនុញ្ញាតឲ្យចូលឡើយ ។

ចំណែកអ្នកធ្វើដំណើរមកពីអឺរ៉ុប និងអូស្រ្តាលីត្រូវតែនាំមកនូវលទ្ធផលធ្វើតេស្តអវិជ្ជមាន ហើយក៏ត្រូវបានគេពិនិត្យបន្ថែមទៀតផងដែរ នៅពេលមកដល់ ហើយបើទោះបីជាការធ្វើតេស្តនេះមានលទ្ធផលអវិជ្ជមានក៏ដោយក៏ត្រូវធ្វើចត្តាឡីស័ករយៈពេល ៥ ថ្ងៃ ។

លោក Doni Monardo ដែលជាប្រធានក្រុមការងារបានប្រាប់កិច្ចពិភាក្សាតាមវិទ្យុកាលពីថ្ងៃព្រហស្បតិ៍ថា ច្បាប់ថ្មីសម្រាប់អឺរ៉ុប និងអូស្រ្តាលីធ្វើឡើងបន្ទាប់ពីមានការរីករាលនៃវីរុសកូរ៉ូណាក្លាយពូជប្រភេទថ្មីនៅទីនោះ ហើយសារាចរនេះចូលជាធរមាន និងមានប្រសិទ្ធិភាពរហូតដល់ថ្ងៃទី ៨ ខែមករា ឆ្នាំ ២០២១ ។

គួរបញ្ជាក់ថា ប្រទេសឥណ្ឌូនេស៊ីមានការរីករាលដាលនៃជំងឺកូវីដ ១៩ ដ៏អាក្រក់បំផុតនៅអាស៊ីអាគ្នេយ៍ដោយមានករណីឆ្លងសរុបចំនួន ៦៩២,៨៣៨ ករណី និងមានអ្នកស្លាប់ ២០,៥៨៩ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ ខណៈករណីឆ្លងផ្ទុះខ្លាំង អ្នកខេត្ត សាមុត សាខន រារាំងអាជ្ញាធរមិនឲ្យបង្កើតមន្ទីរពេទ្យដាក់អ្នកជំងឺកូវីដ

ចុចអាន ៖ ទំនាយរបស់លោកយាយពិការភ្នែក​ Baba Vanga សម្រាប់ឆ្នាំ២០២១ ពិតជារន្ធត់