ប្រទេសអាស៊ីមួយទៀតរកឃើញវីរុសកូរ៉ូណាក្លាយពូជប្រភេទថ្មី

ប្រទេសកូរ៉េខាងត្បូងនៅថ្ងៃចន្ទនេះបានប្រកាសពីការរកឃើញករណីដំបូងនៃជំងឺកូវីដក្លាយពូជប្រភេទថ្មីដែលត្រូវបានកំណត់សញ្ញាណដំបូងនៅក្នុងចក្រភពអង់គ្លេស ។

អាជ្ញាធរសុខាភិបាលរបស់ប្រទេសនេះបាននិយាយថា ជនជាតិកូរ៉េខាងត្បូង ៣ នាក់ដែលបានវិលត្រឡប់មកពីចក្រភពអង់គ្លេសកាលពីសប្តាហ៍មុនបានធ្វើតេស្តវិជ្ជមានជំងឺកូវីដក្លាយពូជប្រភេទថ្មី ។ នេះបើយោងតាមសារព័ត៌មាន Yonhap បានរាយការណ៍ ។

អាជ្ញាធរកូរ៉េខាងត្បូងក៏កំពុងធ្វើការស៊ើបអង្កេតផងដែរថាតើបុរសចំណាស់ម្នាក់ដែលទើបនឹងត្រឡប់មកពីចក្រភពអង់គ្លេសហើយបានធ្វើតេស្តវិជ្ជមានជំងឺកូវីដ ១៩ ជាប់ទាក់ទងនឹងជំងឺកូវីដក្លាយពូជប្រភេទថ្មីឬក៏អត់ ខណៈសមាជិកគ្រួសារ ២ នាក់របស់គាត់ក៏បានឆ្លងវីរុសនេះ ហើយប្រពន្ធរបស់គាត់កំពុងរង់ចាំលទ្ធផលតេស្ត ។

ទន្ទឹមនឹងនេះដែរប្រទេសកូរ៉េខាងត្បួងបានរាយការណ៍ថាមានករណីឆ្លងថ្មីនៃជំងឺកូវីដ ១៩ ចំនួន ៨០៨ ករណី ក្នុងនោះមានការឆ្លងក្នុងស្រុកចំនួន ៧៨៧ ករណីដែលធ្វើឲ្យចំនួនឆ្លងសរុបក្នុងប្រទេសកើនឡើងដល់ ៥៧,៦៨០ ករណី និងមានអ្នកស្លាប់ចំនួន ៨១៩ នាក់ចាប់តាំងពីការផ្ទុះឡើងនៃជំងឺនេះ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ ជប៉ុនរកឃើញករណីឆ្លងជំងឺកូវីដក្លាយពូជប្រភេទថ្មី បន្ថែម

ចុចអាន ៖ បើអ្នកមានប្រតិកម្មក្រោយចាក់វ៉ាក់សាំងកូវីដ តើអ្នកណានឹងផ្តល់សំណង ក្រុមហ៊ុនឬរដ្ឋាភិបាល?