តូក្យូ បំបែកកំណត់ត្រាមួយថ្ងៃឆ្លងកូវីដជាង១,០០០នាក់ ជប៉ុនព្រមានដាក់ទីក្រុងក្នុងគ្រាអាសន្ន

នៅថ្ងៃព្រហស្បតិ៍ទី៣១ខែធ្នូនេះ ទីក្រុងតូក្យូបានរាយការណ៍អំពីការឆ្លងជំងឺកូវីដ១៩ថ្មីជាង១,០០០ករណីដែលនេះជាកំណត់ត្រាថ្មីខណៈមន្រ្តីមូលដ្ឋាននិងរដ្ឋាភិបាលបានព្រមានថា វិធានការដាក់ប្រទេសក្នុងគ្រាអាសន្នអាចនឹងត្រូវការជាចាំបាច់ដើម្បីដោះស្រាយករណីដែលកំពុងហក់ឡើងខ្ពស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារសារព័ត៌មានជប៉ុន Jiji បានរាយការណ៍ថា លោកនាយករដ្ឋមន្រ្តី Yoshihide Suga បានកោះប្រជុំជាបន្ទាន់ជាមួយរដ្ឋមន្រ្តីស្តីពីស្ថានភាពមេរោគនៅល្ងាចថ្ងៃព្រហស្បតិ៍នេះ។

អភិបាលក្រុងតូក្យូលោកស្រី Yuriko Koike បានប្រាប់អ្នកយកព័ត៌មានថា “យើងកំពុងប្រមូលតួលេខច្បាស់លាស់នៅថ្ងៃនេះ។ គេបានរាយការណ៍មកខ្ញុំថា វានឹងមានលើស១,០០០ករណីហើយនៅកន្លែងខ្លះមានប្រហែល១,៣០០ករណី”។

លោកស្រីបានព្រមានថា “សម្រាប់វីរុសកូរ៉ូណា គ្មានថ្ងៃចុងឆ្នាំនិងគ្មានថ្ងៃឈប់សម្រាកចូលឆ្នាំថ្មីទេ។ នៅក្នុងរដូវរងានេះ យើងកំពុងមើលឃើញការឆ្លងវីរុសនេះហើយវាគឺជាស្ថានភាពធ្ងន់ធ្ងរបំផុត”។

ប្រទេសជប៉ុនត្រូវបានគេមើលឃើញថាអាចគ្រប់គ្រងការផ្ទុះឡើងនៃជំងឺកូវីដ១៩បានបើប្រៀបធៀបទៅនឹងផ្នែកខ្លះនៃពិភពលោកពោលគឺមានអ្នកស្លាប់តិចជាង៣,៥០០នាក់ចាប់តាំងពីខ្លួនបានកត់ត្រាករណីដំបូងនៃវីរុសនេះកាលពីខែមករា។

ជប៉ុនក៏បានចៀសវាងវិធានការបិទប្រទេសដ៏តឹងរ៉ឹងដែលត្រូវបានប្រើនៅក្នុងប្រទេសមួយចំនួនផងដែរបើទោះបីជារដ្ឋាភិបាលបានដាក់ស្ថានភាពអាសន្ននៅនិទាឃរដូវដោយអំពាវនាវឲ្យបិទអាជីវកម្មនិងស្នើសុំឲ្យប្រជាជនស្នាក់នៅក្នុងផ្ទះក៏ដោយ៕

ប្រែសម្រួលដោយ៖ Vann Vann

ប្រភព៖ CNA

ចុចអាន៖ ជប៉ុនរកឃើញអ្នកឆ្លងវីរុសកូរ៉ូណាក្លាយពូជប្រភេទថ្មី ៥ករណី

ចុចអាន៖ ធ្លាក់ព្រិលកប់រថយន្ត១,០០០គ្រឿង ស្ទះចរាចរណ៍២ថ្ងៃនៅ ជប៉ុន