មេដឹកនាំគណបក្សប្រឆាំងរុស្ស៊ី ត្រូវចាប់ខ្លួនពេលវិលចូលប្រទេសវិញ

អ្នករិះគន់ខ្លាំងក្លាបំផុតលើលោក Putin គឺលោក Alexei Navalny ត្រូវបានឃាត់ខ្លួនបន្ទាប់ពីជិះយន្តហោះត្រឡប់ទៅទីក្រុងមូស្គូវិញ ក្រោយចាកចេញពីប្រទេសអាល្លឺម៉ង់ ពោលគឺមានរយៈពេល៥ខែបន្ទាប់ពីគាត់ស្ទើរតែត្រូវបានសម្លាប់ ដោយការវាយប្រហារដាក់ថ្នាំបំពុល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សកម្មជនអាយុ៤៤ឆ្នាំរូបនេះ ត្រូវបានប៉ូលិសនាំខ្លួនទៅនៅឯកន្លែងត្រួតពិនិត្យលិខិតឆ្លងដែន ក្នុងអាកាសយានដ្ឋាន Sheremetyevo។

លោក Navalny បានស្តីបន្ទោសអាជ្ញាធររុស្ស៊ីចំពោះការប៉ុនប៉ង ធ្វើបាបជីវិតរបស់គាត់កាលពីឆ្នាំមុន។ ទោះបីជាយ៉ាងណាក៏ដោយ វិមានក្រឹមឡាំងបានបដិសេធ។

នៅពេលដែលលោក Navalny ត្រូវបានបំពុលកាលពីខែសីហានិងដួល ខណៈត្រៀមឡើងយន្តហោះនៅក្នុងតំបន់ Siberia គាត់ត្រូវបានបញ្ជូនទៅប្រទេសអាល្លឺម៉ង់ដើម្បីទទួលការព្យាបាលបន្ទាន់។ នៅពេលគាត់ជាសះស្បើយ គាត់បាននិយាយថា គាត់មានបំណងវិលត្រឡប់ទៅប្រទេសរុស្ស៊ីវិញ។

កាលពីថ្ងៃអាទិត្យ គាត់បានធ្វើតាមការសន្យា ដោយឡើងជិះជើងហោះហើររបស់ក្រុមហ៊ុនអាកាសចរណ៍ Pobeda Airlines បើទោះបីជាមានការព្រមានថា គាត់ត្រូវប្រឈមមុខនឹងការចាប់ខ្លួននៅពេលទៅដល់ក៏ដោយ។

នៅក្នុងសេចក្តីថ្លែងការណ៍មួយកាលពីល្ងាចថ្ងៃអាទិត្យ សេវាកម្មពន្ធនាគាររបស់ប្រទេសរុស្ស៊ីបាននិយាយថា មេដឹកនាំគណបក្សប្រឆាំងរូបនេះត្រូវគេតាមចាប់ខ្លួនតាំងពីថ្ងៃទី២៩ខែធ្នូឆ្នាំ២០២០មក សម្រាប់ការរំលោភបំពានរយៈពេលនៃការព្យួរទោសម្តងហើយម្តងទៀត។ លិខិតនោះបន្ថែមថា គាត់នឹងស្ថិតក្នុងការឃុំឃាំងរហូតដល់មានសេចក្តីសម្រេចពីតុលាការ។

អាជ្ញាធរបានចោទប្រកាន់គាត់ពីបទរំលោភលើលក្ខខណ្ឌ ដែលបានដាក់បន្ទាប់ពីការផ្តន្ទាទោសពីបទកិបកេងប្រាក់។ លោកតែងតែនិយាយថា ករណីនេះគឺជារឿងនយោបាយ។

ដោយឡែក រដ្ឋអាជ្ញារុស្ស៊ីបានបើកសវនាការរឿងក្តីព្រហ្មទណ្ឌថ្មីប្រឆាំងនឹងលោក Navalny ពីបទឆបោក ពាក់ព័ន្ធនឹងការផ្ទេរប្រាក់ទៅឲ្យអង្គការសប្បុរសធម៌ផ្សេងៗរួមទាំងមូលនិធិប្រឆាំងអំពើពុករលួយរបស់គាត់ជាដើម៕

ប្រែសម្រួលដោយ៖ Vann Vann

ប្រភព៖ BBC

ចុចអាន៖ Putin ៖ វិមានក្រឹមឡាំងដឹងថា បរទេសនឹងជ្រៀតជ្រែកក្នុងការបោះឆ្នោតរុស្ស៊ីឆ្នាំ២០២១