ជប៉ុនរកឃើញវីរុសកូរ៉ូណាបម្លែងខ្លួនប្រភេទថ្មីលើមនុស្សដែលគ្មានប្រវត្តិធ្វើដំណើរទៅអង់គ្លេស

ក្រសួងសុខាភិបាលជប៉ុនបាននិយាយកាលពីថ្ងៃចន្ទ ទី១៨ ខែមករា ថា ក្រុមគ្រូពេទ្យជប៉ុនបានរកឃើញវីរុសកូរ៉ូណាបម្លែងខ្លួនប្រភេទថ្មីដែលត្រូវបានគេរកឃើញដំបូងនៅក្នុងប្រទេសអង់គ្លេសក្នុងចំណោមមនុស្ស ៣ នាក់ដែលមិនបានធ្វើដំណើរទៅទីនោះ ។

ក្រសួងបាននិយាយថា អ្នកទាំងបីមានអាយុចាប់ពី ២០ ឆ្នាំដល់ ៦០ ឆ្នាំ និងរស់នៅក្នុងខេត្ត Shizuoka ដែលមានចម្ងាយប្រហែល ២០០ គីឡូម៉ែត្រខាងលិចទីក្រុងតូក្យូ ខណៈពួកគេមានរោគសញ្ញាដំបូងនៅដើមខែមករា ។

មន្ត្រីក្រសួងសុខាភិបាលបាននិយាយថា អាជ្ញាធរកំពុងពិនិត្យមើលថាតើអ្នកទាំងបីឆ្លងវីរុសនេះយ៉ាងដូចម្តេច ប៉ុន្តែមិនទាន់មានភស្តុតាងណាមួយដែលបញ្ជាក់ថាវីរុសដែលត្រូវបានរកឃើញដំបូងនៅប្រទេសអង់គ្លេសកំពុងរីករាលដាលនៅខេត្ត Shizuoka នោះទេ ។

លោក Takaji Wakita ប្រធានវិទ្យាស្ថានជាតិជំងឺឆ្លងបានប្រាប់អ្នកសារព័ត៌មានថា “វីរុសកូរ៉ូណាបម្លែងខ្លួនប្រភេទថ្មីត្រូវបានរកឃើញពីប្រជាជនដែលមិនមានប្រវត្តិធ្វើដំណើរទៅចក្រភពអង់គ្លេស យើងអាចសន្មតថា ពួកគេឆ្លងនៅក្នុងប្រទេសជប៉ុនតែម្ដង” ។

គួរបញ្ជាក់ថា រហូតមកដល់ពេលនេះប្រទេសជប៉ុនបានរកឃើញករណីឆ្លងវីរុសកូរ៉ូណាបម្លែងខ្លួនប្រភេទថ្មីចំនួន ៤៥ ករណី បន្ទាប់ពីវីរុសនេះត្រូវបានគេរកឃើញដំបូងនៅក្នុងប្រទេសអង់គ្លេស អាហ្វ្រិកខាងត្បូង និងប្រេស៊ីល ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ ព្រិលធ្លាក់ខ្លាំងនៅជប៉ុនសម្លាប់មនុស្ស ៨ នាក់ បង្កគ្រោះថ្នាក់រាប់រយនាក់

ចុចអាន ៖ លោកយាយចំណាស់ជាងគេបំផុតនៅលើពិភពលោកចង់រស់នៅ ២ ឆ្នាំទៀត ក្រោយប្រារព្ធពិធីខួបកំណើត