KPT+

គិតថា ភាពយន្តរឿង Frozen បានបង្រៀនពីការយកឈ្នះជំងឺផ្លូវចិត្តដែរទេ?

បានផុស

៣ years មុន

នៅ

ថ្ងៃពុធ ២៨ តុលា ២០២០

ដោយ

តាមការវិភាគរបស់ goalcast ខ្សែភាពយន្ត Frozen ឆ្នាំ ២០១៩ ពិតជាគួរឱ្យភ្ញាក់ផ្អើលដែលតួអង្គនាងអេលសាបង្ហាញច្បាស់នូវការតស៊ូដើម្បីទទួលយកអ្វីដែលជាខ្លួនឯងពិតៗ។

អេលសា កើតមកមានអំណាចវេទមន្តមួយ ដែលពីដំបូង នាងមិនអាចគ្រប់គ្រងបានសោះ។ អ្វីគ្រប់យ៉ាងដែលនាងប៉ះបានប្រែក្លាយទៅជាព្រិលនិងទឹកកកមួយរំពេច ដែលបង្ខំនាងឱ្យមានអារម្មណ៍ថាខ្លួនឯងចម្លែកខុសគេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដូចអ្នកដែលរស់នៅ ជាមួយជំងឺផ្លូវចិត្ត នាពេលបច្ចុប្បន្ន គឺពួកគេកំពុងតស៊ូជាមួយបិសាចក្នុងខ្លួន ដូចដែលអេលសាខំប្រយុទ្ធដើម្បីសង្កត់លើអំណាចពិសេសរបស់នាងឱ្យអ្វីៗនាងអាចគ្រប់គ្រងវាបានឡើងវិញ។

នាងត្រូវបានបង្រៀនឱ្យរក្សាអំណាចរបស់នាងជាការសម្ងាត់ បន្ទាប់ពីនាងធ្វើបាបប្អូនស្រីតូចរបស់នាងគឺ អេនណាដោយចៃដន្យ ជាមួយនឹងអំណាចនោះ ព្រះមហាក្សត្រនិងព្រះមហាក្សត្រីបានណែនាំអេលសាឱ្យរក្សាអំណាចរបស់នាងឱ្យជាប់ដើម្បីកុំឱ្យបង្ករបញ្ហាលើនរណាម្នាក់ទៀតឱ្យសោះ។ នាងត្រូវបានគេផ្តល់ស្រោមដៃ ដើម្បីលាក់ចុងម្រាមដៃហើយថែមទំាងត្រូវបានគេបង្រៀនឱ្យទប់អារម្មណ៍ទៀតដែលជាហេតុផលឱ្យនាងរស់នៅក្នុងភ័យខ្លាច គឺខ្លាចធ្វើខុស។

បន្ទាប់ពីឪពុកម្តាយស្លាប់អស់ នាងក្លាយជាក្មេងស្រីជាក្មេងជំទង់បន្តភាពឯកោដោយបានបិទបាំងការពិតពីមនុស្សគ្រប់គ្នារួមទាំងអេនណាជាប្អូនផងអំពីវេទមន្តនោះ។

មិនត្រឹមតែខ្លាចធ្វើបាបអ្នកដទៃប៉ុណ្ណោះ តែនាងខ្លាចខ្លួនឯងទៀត។

តាមរបៀបដូចគ្នាមនុស្សដែលមានជំងឺផ្លូវចិត្តជារឿយៗភ័យខ្លាចការវិនិច្ឆ័យ ការមាក់ងាយដែលព័ទ្ធជុំវិញស្ថានភាពរស់នៅរបស់ពួកគេ ដោយជ្រើសរើសវិធីផ្តាច់ខ្លួន។

អេលសាបានរស់នៅតែម្នាក់ឯងអស់រយៈពេលជាច្រើនឆ្នាំ។ នាងមានអារម្មណ៍ខ្មាស់អៀនរហូតដល់ថ្ងៃគ្រងរាជ្យអេលសាបានជ្រុលដៃ ធ្វើឱ្យព្រះនគររបស់នាង ត្រូវរងវេទមន្តដោយអចេតនា ទៅក្នុងរដូវរងារសក្បុស គ្មានថ្ងៃរលាយវិញទៀត។

ពោរពេញដោយភាពខ្មាស់អៀននិងអាក់អន់ក្រៀមស្រពោន នាងបានសម្រេចចិត្តភៀសខ្លួនពីនគរ ស្វែងរកការជ្រកកោននៅលើភ្នំទឹកកកដែលជាកន្លែងមួយនាងយល់ថាអាចរស់នៅម្នាក់ឯងមិនបង្កររឿងជាមួយអ្នកណា។

សម្រាប់អ្នកដែលមានជំងឺផ្លូវចិត្ត ពួកគេក៏មានអារម្មណ៍ពិបាកក្នុងការដោះស្រាយចំពោះការរៀនស្រឡាញ់ខ្លួនឯង។ ករណីអេលសាដែលរស់នៅតែម្នាក់ឯងក្នុងប្រាង្គប្រាសាទទឹកកកដ៏ស្រស់ស្អាត ទីបំផុតបានដោះស្រោមដៃដែលលាក់អំណាចមន្តអាគមអស់រយៈពេលជាយូរមកហើយនោះចេញ រស់ជាខ្លួនឯងយ៉ាងពិតប្រាកដ។

ដោយមានអារម្មណ៍ថា មានសិទ្ធិអំណាចនាងបានចេញ “Let It Go” នៅពេលដែលនាងបានដោះលែងអតីតកាលរបស់នាង និងការភ័យខ្លាចដែលកំពុងរារាំងនាង។

មនុស្សដែលទទួលរងពីជំងឺផ្លូវចិត្តជារឿយៗតស៊ូជាមួយនឹងការទទួលយកខ្លួនឯង ថាតើពួកគេជានរណា។

រឿងរ៉ាវរបស់អេលសា គឺជារឿងមួយដែលល្អសម្រាប់កុមារនិងវ័យជំទង់ទៅទស្សនា ។ពួកគេនិងយល់ពីសារៈសំខាន់នៃការទទួលយកភាពទន់ខ្សោយរបស់ខ្លួនឯង និងបើកចំហរការពិតទៅកាន់អ្នកដទៃដើម្បីទទួលយកមកវិញនូវភាពរឹងមាំដែលព្រមឆ្លងកាត់លការលំបាកនៃជីវិតឯកជនម្នាក់ៗ៕

អត្ថបទ៖ ចម្រើន តារា

ចុចអាន៖ អានរឿងនេះហើយ អ្នកនឹងលែងកម្រោលទៅកាន់មនុស្សម្នា