ព័ត៌មានជាតិ

កសិករដាំបន្លែសុវត្ថិភាព ដើម្បីសុខភាពអ្នកបរិភោគ និងផ្គត់ផ្គង់ជីវភាពគ្រួសារ

បានផុស

៤ years មុន

នៅ

ថ្ងៃសៅរ៍ ៥ ធ្នូ ២០២០

ដោយ

បន្លែសុវត្ថិភាព សំបួរមាស ក្រុងកំពង់ចាម កំពុងពេញនិយម សម្រាប់អ្នកបរិភោគ ដោយគេដឹងថាប្រជាកសិករ ក្នុងតំបន់នេះ បានផលិតបន្លែ មិនប៉ះពាល់ដល់សុខភាព ដល់អ្នកបរិភោគ។ នេះបើតាម ការគូសបញ្ជាក់ឲ្យដឹង ពីកសិករមួយរូប ដែលបច្ចុប្បន្នគាត់ជាប្រធានសហគមន៍បន្លែសុវត្ថិភាព សំបួរមាស នៅក្នុងសង្កាត់សំបួរមាស ក្រុងកំពង់ចាម ខេត្តកំពង់ចាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី ទូច ស្រស់ បានប្រាប់ឲ្យដឹងថា សព្វថ្ងៃនេះ បងប្អូនប្រជាកសិករ ដាំដំណាំបន្លែសុវត្ថិភាពនៅតំបន់នេះ មានប្រមាណជា ១០គ្រួសារ ហើយបានបង្កើតជាបណ្ដុំសហគមន៍មួយ ដោយការគាំទ្រ ពីមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ចាម ក្នុងការផ្ដល់វគ្គបណ្ដុះបណ្ដាលជំនាញបច្ចេកទេសខ្លីៗ ស្តីពីការដាំដុះ ការថែរទាំ និងការប្រើប្រាស់ជី ជាដើម។ លោកស្រីប្រធានសហគមន៍បន្លែសុវត្ថិភាព រូបនេះ បានបន្ថែមថា ការដាំបន្លែនេះ មានការខូចខាតច្រើន ដោយសារការប្រែប្រួលអាកាសធាតុ បណ្ដាលឲ្យខ្វះទឹក និងកើតនូវសត្វល្អិតចង្រៃបំផ្លាញដំណាំ ជាដើម…។ កសិកររូបនេះ បញ្ជាក់ថា ការដាំដុះបន្លែមានសុវត្ថិភាព បានផ្ដល់នូវអត្ថប្រយោជន៍យ៉ាងសំខាន់ សម្រាប់ផ្គត់ផ្គង់ជីវភាពគ្រួសារ ខ្លួនឯងផង និងសុខភាពអ្នកបរិភោគ ផងដែរ។ យ៉ាងណាមិញ ឆ្នាំនេះ ទោះបីមិនមានគ្រោះទឹកជំនន់ តែការប្រមូលផលរបស់ពួកគាត់ មិនសូវបានផលល្អប៉ុន្មានទេ ប៉ុន្តែ ការលក់នៅលើទីផ្សារវិញ ទទួលតម្លៃខ្ពស់សមរម្យ ពោលគឺ មិនមានការធ្លាក់ថ្លៃនោះទេ។

ដោយឡែក បើតាមការឲ្យដឹង ពីកសិករម្នាក់ ក្នុងសកម្មភាពកំពុងថែទាំបន្លែក្នុងថ្នាលខ្លឹម អ៊ំស្រី ឃាង ស៊ីថូ បានគូសបញ្ជាក់ថា ទោះបីដំណាំបន្លែសុវត្ថិភាព មានការយឺតយាវ ក្នុងការដាំដុះ ក៏ពិតមែន ប៉ុន្តែ តម្រូវការទីផ្សារ នៅតែមានជាហូរហែ។ ជាក់ស្ដែង ក្រោយពីបង្កើតផ្សារចុងសប្តាហ៍ នៅក្នុងក្រុងកំពង់ចាម មកបានធ្វើឲ្យបន្លែសុវត្ថិភាព របស់អុំស្រីដាំដុះ សឹងតែមិនទាន់តម្រូវការទីផ្សារ ទៅទៀត។ អ៊ំស្រីបន្ថែមទៀតថា ពីមួយឆ្នាំទៅមួយឆ្នាំ ការប្រកបរបរដាំបន្លែសុវត្ថិភាពនេះ ប្រឈមនឹងអាកាសធាតុមែន ប៉ុន្តែអាចជួយផ្គត់ផ្គង់ជីវភាពគ្រួសារ អ៊ំស្រីបានល្អប្រសើរជាងមុន បើទោះបីបច្ចុប្បន្នយើងកំពុងប្រឈមទៅនឹងវិបត្តិកូវីដ ១៩ ក៏ដោយ ។

គួរកត់សម្គាល់ថា បច្ចុប្បន្នប្រជាកសិករ ក្នុងតំបន់ខាងលើបានដាំបន្លែសុវត្ថិភាព។ ក្នុងនោះដែរ ពួកគាត់បានដាំដំណាំបន្លែច្រើនប្រភេទ មានដូចជា ៖ សាឡាត់ ខាត់ណាក្តោប ខាត់ណាផ្កា ខ្ទឹម ម្ទេស និងបន្លែ ជាច្រើនប្រភេទទៀត។ ទន្ទឹមជាមួយនឹងការដាំដុះ នូវមុខដំណាំទាំងអស់នេះដែរ បងប្អូនប្រជាកសិករយើងមួយចំនួន ក៏បានធ្វើការប្រមូលផល ជាបណ្ដើរ ទៅតាមដំណាក់កាលនីមួយៗ ផងដែរ ៕