ព័ត៌មានជាតិ

អ្នករស់នៅក្បែរផ្ទះអ្នកឆ្លងជំងឺកូវិដ ត្រូវបានយកចិត្តទុកដាក់ពីអាជ្ញាធរ និងចុះជួយគ្រប់ពេល

បានផុស

៤ years មុន

នៅ

ថ្ងៃសៅរ៍ ៥ ធ្នូ ២០២០

ដោយ

ប្រជាពលរដ្ឋ ដែលមានលំនៅឋានក្បែរនិងអ្នកឆ្លងជំងឺកូវីដ មានការកក់ក្តៅដោយបានអាជ្ញាធរចុះទៅជួយផ្តល់ជាយោបល់រួមទាំងស្បៀងអាហារ និងការប្រើប្រាស់គ្រប់គ្រាន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្តែងនៅថ្ងៃទី៥ ខែធ្នូនេះ លោក ចេង មុនីរ៉ា អភិបាលខណ្ឌច្បារអំពៅរួមនិងលោក លោកស្រី អភិបាលរងខណ្ឌ លោកនាយករដ្ឋបាលសាលាខណ្ឌច្បារអំពៅ ព្រមទាំងមានការចូលរួមពីក្រុមគ្រូពេទ្យយុវជនស្ម័គ្រចិត្តសម្តេចតេជោ(TYDA)បានចុះទៅផ្សព្វផ្សាយពីវិធាន ក្នុងការធ្វើចត្តាឡីសក័ ដោយអនុវត្តតាមការណែនាំរបស់ក្រសួងសុខាភិបាល ដើម្បីចូលរួមបង្ការនិងទប់ស្កាត់ការឆ្លងរីករាលដាលជំងឺកូវីដ១៩ជូនដល់ប្រជាពលរដ្ឋ ដែលរស់នៅក្នុងសង្កាត់វាលស្បូវនិងសង្កាត់និរោធ ដែលជាទីតាំងលំនៅឋានអ្នកឆ្លងជំងឺកូវីដនាថ្ងៃទី២៨ ខែវិច្ឆិកា។

យោងតាមប្រសាសន៍របស់លោក ហ៊ត គឹមនី អភិបាលរងខណ្ឌច្បារអំពៅ បានបញ្ជាក់ថា ទីតាំងដែលអាជ្ញាធរខណ្ឌច្បារអំពៅរួមជាមួយក្រុមគ្រូពេទ្យយុវជនស្ម័គ្រចិត្តសម្តេចតេជោ ចុះទៅជួយផ្សព្វផ្សាយនេះ គឺស្ថិតក្នុងបុរីលឹម ឈាងហាក់ មានទីតាំងក្នុងភូមិវាលស្បូវសង្កាត់វាលស្បូវនិងទីតាំងមួយទៀត ក្នុងក្រុមទី៥ភូមិបឹងឈូកសង្កាត់និរោធ។ លោកអភិបាលរងខណ្ឌ បានបន្តថា ក្នុងពេលចុះទៅដល់ទីតាំងទាំង២ ក៏មានការផ្តល់ជូននៅស្បៀងអាហារសម្រាប់ជូនដល់បងប្អូន ក្នុងក្រុមទី៥ភូមិបឹងឈូកចំនួន១១១គ្រួសារ ក្នុងមួយគ្រួសារទទួលបានសាច់ជ្រូក២គីឡូក្រាម និងសម្ភារៈផ្សេងៗទៀត។

ក្នុងនោះបងប្អូនប្រជាពលរដ្ឋ ក៏បាននិយាយថា សូមកុំឲ្យបងប្អូនដែលរស់នៅក្រៅតំបន់នេះ មានការព្រួយបារម្ភខ្លាចជំងឺកូវីដនេះ ឆ្លងរាលដាលដល់ពួកគាត់ ដែលរស់នៅក្បែរផ្ទះអ្នកឆ្លងជំងឺនេះ ព្រោះអីពួកគាត់កំពុងតែខិតខំថែរក្សាអនាម័យគ្រប់ៗគ្នា ហើយមិនចេញក្រៅផ្ទះនោះឡើយ ដោយសារតែពួកគាត់ខ្លាចឆ្លងរាលដាលជាសហគមន៍ ដូច្នេះសូមបងប្អូនប្រជាពលរដ្ឋកុំបារម្ភអី។ ចំណែកអាជ្ញាធរវិញ គឺលោកបានចុះមកជួយសឹងគ្រប់ពេលដោយនាំមកនូវត្រីសាច់បន្លែបង្ការថែមទាំងអង្ករនិងថវិការបស់សម្តេចតេជោទៀតផង។

ប្រជាពលរដ្ឋស្ថិតក្នុងក្រុមទី៥ ភូមិបឹងឈូក បានបន្តទៀតថា ពួកគាត់ទាំង១១១គ្រួសារ គឺពុំមានជំងឺកូវីដ១៩ឡើយ ដោយគ្រាន់តែរស់នៅក្បែរផ្ទះអ្នកឆ្លងប៉ុណ្ណោះ។ ចំណែកអ្នកឆ្លង ត្រូវបានក្រុមគ្រូពេទ្យនិងអាជ្ញាធរខណ្ឌដឹកយកទៅព្យាបាលនៅមន្ទីរតាំងពីថ្ងៃទី២៨ ខែវិច្ឆិកាមកម្ល៉េះ៕